Moita xente reaccionou e mesmo espertou sobresaltada ás 6.32 da mañá deste venres. Un sismo de magnitude 4,4, dos maiores que se rexistraron nos últimos 25 anos no norte de Galicia, tivo o epicentro a preto de 50 quilómetros ao norte de cabo Ortegal. Preto da mesma zona, no bordo da plataforma continenta, rexistráronse nos últimos 30 días varios tremores máis, o maior deles, o pasado 5 de outubro, de magnitude 3,5, aínda que non foi sentido pola poboación. Nas primeiras horas do venres, ás 6.56, 10.2, 10.42 e 13.03, producíronse outros movementos sísmicos preto do tremor principal, con magnitude, 2,3, 2,5, 2,7 e 2,5, respectivamente.
Por mor da intensidade (escala que mide os efectos dos tremores nas persoas, os obxectos, edificios e natureza e que se representa en números romanos), que chegou a acadar o nivel IV en lugares como A Coruña, Cabanas, Oroso, Cariño, Viveiro, Sada ou Ortigueira, o Instituto Geográfico Nacional (IGN) difundiu a través das súas redes un cuestionario para que as persoas que percibisen o tremor puidesen describir o movemento e os efectos percibidos na contorna. En menos de catro horas xa sumaba preto de 250 notificacións.
https://twitter.com/IGNSpain/status/1453982044405608448
A intensidade IV correspóndese con terremotos “amplamente observados”, sentido por moitas persoas dentro dos edificios e moi poucas fóra, provocando ás veces que algunhas persoas esperten. Destácase por unha vibración moderada que pode afectar ao propio edificio e o mobiliario, e mesmo fai soar as vaixelas, cristalerías, xanelas ou portas, e oscilar os obxectos pendurados.
E así o comunicaron numerosas persoas que a través do teléfono ou as redes sociais se puxeron en contacto con medios como a Radio Galega, que recibiu centos de chamadas de xente que percibiu o sismo.
https://twitter.com/GxDRadioGalega/status/1453946760431226881
Sen ser un lugar de especial risco de que se produzan grandes terremotos, a área do norte de Galicia conta con varias fallas coñecidas, e é unha zona de sismicidade “baixa-moderada”, segundo o propio IGN. Nesta rexión da costa norte de Galicia produciuse no 2006 outro tremor, de magnitude 4,3, que tamén se percibiu nas áreas máis próximas á costa.
Deste xeito, o movemento deste venres é o maior tivo lugar nas proximidades de Galicia desde a serie sísmica de Lugo entre 1995 e 1997, que culminou o 21 de maio dese último ano co terremoto de magnitude 5,1 que sacou da cama a miles de persoas durante a madrugada.
O terremoto fronte ás costas de Ortegal coincide no tempo coa sismicidade asociada á erupción volcánica en La Palma, na que se están a producir miles de movementos por mor do ascenso do magma, acadando magnitudes de ata 4,9.
