Os meteorólogos levan semanas coa vista fixa nun fenómeno coñecido como quecemento súbito estratosférico. Detrás cun concepto tan longo agóchase unha explicación relativamente sinxela: consiste na subida acusada e rápida das temperaturas na estratosfera. Segundo o meteorólogo Roberto Granda, pódense producir aumentos de temperatura de 50 graos ou máis en dous días nesta capa da atmosfera. Este fenómeno pode provocar alteracións no vórtice polar e se se propaga cara a troposfera, ter efectos directos sobre Europa, provocando un cambio drástico no tempo. Segundo as hipóteses de diferentes servizos de meteoroloxía, todo apunta a que nos últimos días de febreiro e comezos de marzo se produza unha alteración do tempo no continente que tamén afectará a Galicia.
O seu impacto en Europa sería unha consecuencia da división no vórtice polar estratosférico, que xa provou fenómenos extremos no pasado. Por exemplo, o inverno de 2009-2010, co paso de profundas borrascas dende decembro ata febreiro. Ou o febreiro de 2018, cuxas consecuencias se deixaron notar en marzo de 2018, sendo “o máis húmido dende que hai rexistros”, recolle Granda nun artigo publicado en eltiempo.es. Polo tanto, este quecemento súbito estratosférico pode provocar bloqueos en latitudes altas, derivando nunha circulación máis ao sur das baixas presións e a chegada de aire frío do leste de Europa. En Galicia, poderán chegar borrascas e importantes precipitacións, con masas de aire frío procedentes, tamén, do interior de Europa.
Un evento “histórico”
O investigador da Axencia Estatal de Meteoroloxía (AEMET) Juan Jesús González Alemán, fixo referencia a este fenómeno a través da súa canle de Twitter. Nela, expresaba que o quecemento súbito estratosférico podería provocar un bloqueo anticlónico sobre Escandinavia. Segundo sostén o meteorólogo, os modelos apuntan a unha “robusta estrutura nunca vista nos últimos 40 anos, como mínimo”. E engade que, de producirse, o seu comportamento pode ser clave para España. Tal e como recolle Granda, con efectos que van dende intensas precipitacións ata a chegada de masas de aire frío procedente do interior de Europa.
Por outra banda, o meteorólogo Francisco Martín León apoia as teses dos seus compañeiros de profesión nun artigo publicado en Meteored. Aínda que el aposta por esperar ao luns 28 para ter modelos máis precisos, tamén cre que se producirá un “bloqueo escandinavo histórico” que pode ter repercusións en España. Entre elas, a chegada de borrascas e danas con aire máis fresco do normal. O impacto deste quecemento súbito estratosférico en curso, de producirse, podería chegar nos últimos días deste mes e nos primeiros de marzo.
