Á altura da localidade de Barbate (Cádiz), un grupo de candorcas atacou a un veleiro arousano, preto do punto onde hai uns meses se afundiu o veleiro Champagne polos mesmos motivos. Son as candorcas Gladis, que arremeteron contra a embarcación Corsario cando se dirixía a Palma de Mallorca para participar na próxima Copa do Rey MAPFRE de vela. Os cetáceos acometeron contra o timón da embarcación, que tivo que refuxiarse no porto da Liña da Concepción para valorar as incidencias e as posibles reparacións antes de continuar coa súa viaxe.
No ataque participaron catro candorcas, nunha zona de apenas 15 metros de profundidade e arredor das 18.00 horas. “A sensación que nos deu é coma se chocásemos contra unha pedra e levantasen o barco no alto”, explicou o patrón da embarcación, Jorge Durán, ao medio Gaceta Náutica. Este encontro provocou que o veleiro quedase á deriva, sen timón e sen piloto automático.
José Martínez Redondo, un dos tripulantes, explica que a visita das candorcas é un “gravísimo problema”. “A xente está desesperada, non se atreve a saír navegar porque os seguros xa non queren asegurar as embarcacións”, postula. De feito, alega que “máis do 50% das incidencias están sen notificar porque a xente ten medo de que lle boten do seguro e din que chocaron contra pedras”. Estas compañías, segundo explica, non cobren os danos ocasionados por cetáceos.
Nas imaxes compartidas pódense ver as fracturas que sufriu o barco, que terá que repararse rapidamente se quere chegar á Copa do Rey. Jorge Durán comentou que, despois de que os animais acometeran contra o veleiro, marcharon cando albiscaron outra embarcación pola zona. As candorcas protagonizan ataques neste lugar dende hai uns días, deixando graves incidencias ata nunha docena de barcos.
Durán declarou a Gaceta Náutica que “como alguén non corte isto imos deixar de navegar, tanto os estranxeiros que veñen a facer turismo como os nacionais, porque un día vai pasar unha desgraza”. En maio, o Ministerio de Transición Ecolóxica anunciou que impulsará un proxecto para marcar candorcas e reducir as incidencias das embarcacións. Durante o verán e outono de 2020 comezaron a producirse episodios de interacción entre varios exemplares de Orcinus orca e barcos, principalmente veleiros, tanto no estreito de Xibraltar como nas augas da costa galega. Estes feitos, seguen producíndose ao longo de anos posteriores.
