Aeroporto de Alvedro. Foto: Bene Riobó / CC BY-SA 4.0.
Aeroporto de Alvedro. Foto: Bene Riobó / CC BY-SA 4.0.

O aeroporto de Alvedro bate o récord de temperatura en maio

A estación da Aemet no aeródromo coruñés acadou os 33,6ºC, superando os 32,5ºC que marcara o 29 de maio de 2009, marcando un novo máximo en 2019

O ano 2019 vai camiño de rachar coas marcas de temperatura rexistradas no aeroporto coruñes de Alvedro, no marco duns niveis notablemente altos en toda Galicia. Así, nos primeiros cinco meses de 2019, en Alvedro xa se racharon dous máximos históricos de calor, despois do marcado onte. Ás 13.30 horas, a estación da Axencia Estatal de Meteoroloxía (Aemet) marcou os 33,6ºC, o que supón un novo récord ao superar os 32,5ºC que marcara o 29 de maio de 2009. En febreiro deste ano, o aeródromo coruñés xa superara o máximo histórico, con 24,3ºC marcados o día 26. Un día antes, Ourense tamén rexistrara o máximo de febreiro con 25,5ºC.

No último día do mes, Galicia volveu copar, como xa acontecera en febreiro deste ano, algúns dos rexistros máis altos de España. Así, en Ribadavia rexistráronse 37,2ºC (só superada por El Granado (Huelva), con 38,5ºC, mentres que Ourense chegou aos 36,6ºC e Lugo, aos 36,1ºC. Porén, en ningunha delas se bateron os rexistros históricos porque a Aemet non as inclúe entre as estacións válidas para extrapolar as series históricas. Unhas temperaturas incluso máis cálidas na rede de MeteoGalicia: foron 37,5ºC graos en Ourense e Arnoia, 37,3ºC en Leiro, 37,2ºC en Pantón e 37,1ºC en Ourense-Estacións.

Noutras dúas estacións, tal e como informou a propia Aemet, superáronse valores extremos do período de referencia 1981-2010. Así, a cidade da Coruña, con 33,5ºC, marcou un valor só superado polos 34ºC do 11 de maio do 1965, pero a de onte foi a maior temperatura da serie climatolóxica. E do mesmo xeito, os 33,1ºC do aeroporto de Vigo superaron os 32,8ºC de maio de 2001, e quedaron preto dos 33,6ºC de 1965. Pontevedra e Santiago quedaron ás portas, con 33,9ºC e un máximo de 34ºC que data do 16 de maio de 1992 e o 29 de maio de 2001, respectivamente.

Aínda que a predición adianta un descenso das temperaturas segundo avance a fin de semana, o primeiro día de xuño arrancou tamén con valores moi altos. Así, antes das 13 horas xa se acadaran os 32ºC en Lourenzá, 31,1ºC en Pantón, 30,5ºC en Ribas de Sil e 30,2º no campus de Lugo. Mesmo en estacións por riba dos 900 metros de altitude, como O Invernadeiro, A Mezquita ou O Xurés, antes do mediodía xa se rebasaran os 25ºC.

 

DEIXAR UNHA RESPOSTA

Please enter your comment!
POLÍTICA DE COMENTARIOS:

GCiencia non publicará comentarios ofensivos, que non sexan respectuosos ou que conteñan expresións discriminatorias, difamatorias ou contrarias á lexislación vixente.

GCiencia no publicará comentarios ofensivos, que no sean respetuosos o que contentan expresiones discriminatorias, difamatorias o contrarias a la ley existente.

Please enter your name here

Este sitio emprega Akismet para reducir o spam. Aprende como se procesan os datos dos teus comentarios.