A semana comeza en Galicia cun novo temporal de chuvia e vento, tanto en terra como no mar. O prato forte agárdase o mércores, cando empeore a situación meteorolóxica e se activen varios avisos ao longo do territorio. Sen ir máis lonxe, a máxima alerta está marcada para o litoral noroeste da Coruña e para a Costa da Morte nas últimas horas do mércores por ondas que poderán superar os oito metros. O resto do litoral estará en aviso laranxa por vento e ondas. Segundo indica a última actualización do boletín de avisos de Meteogalicia, a alerta amarela estará acendida o mércores en todo o territorio galego por abundantes acumulados de precipitación. Os concellos da Mariña lucense estarán en laranxa por refachos superiores aos 100 km/h.
Sen grandes cambios
A responsable desta situación será unha borrasca situada ao norte de Galicia cunha forte circulación do suroeste que deixará moita chuvia, sobre todo na fachada atlántica. Malia que o mércores vai ser o día con maior número de alertas activadas no curto prazo, o martes tamén será unha xornada na que convirá extremar as precaucións. Entrará unha fronte especialmente activa pola mañá que activará os avisos laranxas en toda a costa agás na Mariña lucense, en amarelo. Tamén estará acendido en terra na provincia de Pontevedra, no sur de Ourense e no interior e oeste da Coruña por chuvia abundante.
Non está previsto que amainen as precipitacións a curto prazo. O xoves Galicia estará aínda baixo a influencia das baixas presións situadas en Irlanda, polo que haberá unha elevada probabilidade de chuvia, sobre todo pola tarde. O escenario está previsto que se repita o venres, con circulación de suroeste e precipitación abundante na maior parte de Galicia. Os modelos debuxan unha breve tregua o sábado, mais só duraría unhas horas. Está previsto que as frontes volvan entrar pola fachada atlántica o domingo.
