A Axencia Estatal de Meteoroloxía (AEMET) declarou a alerta vermella por “perigo extraordinario” debido a fenómenos adversos na costa da Coruña. O aviso entrará en vigor o mércores 21 de xaneiro e manterase activo durante toda a xornada. Prevese mar combinado do noroeste, con ondas de entre 8 e 9 metros, así como ventos de entre 50 e 61 km/h, correspondentes a forza 7, como consecuencia do carrusel de borrascas chegará durante a semana.
Ao longo do martes, o temporal irá intensificándose no mar. Na actualidade, a costa atópase en alerta laranxa por perigo importante, con ondas de 5 a 6 metros, que poderán alcanzar ata os 7 metros de altura en mar aberto. Esta situación afecta a todo o litoral galego.
A situación de alerta vermella manterase durante o xoves 22, aínda que o temporal deixará paso a un episodio de ventos máis fortes. Dende as Rías Baixas ata A Mariña agárdanse ventos do oeste e suroeste de entre 62 e 74 km/h, con forza 8, dende a tarde.
