A Xunta de Galicia amplía as zonas en nivel vermello por episodio de calor extrema fronte aos posibles efectos das altas temperaturas sobre a saúde. Segundo os datos de MeteoSalud e MeteoGalicia, a comunidade seguirá influenciada cunha masa de aire moi cálida, con valores moi elevados en zonas do interior, que poderán superar os 33-34ºC, mentres o val do Miño e do Sil poden chegar a 39-40ºC. No litoral os valores serán de preto de 30ºC.
O nivel 3 —vermello— afectará ás zonas isoclimáticas do noroeste da Coruña, A Mariña, centro e sur de Lugo, montaña de Lugo e Valdeorras. Mentres, o nivel 2 —laranxa— influirá sobre o interior da Coruña, noroeste de Ourense, Miño de Ourense, montaña de Ourense e o interior de Pontevedra.
No caso do deporte, a Xunta, a través da Secretaría Xeral para o Deporte, determinou a suspensión da actividade deportiva federada e do programa Xogade no exterior entre as 12:00 e as 20:00 horas nas zonas afectadas pola alerta vermella. Así mesmo, suspenderase a actividade deportiva federada e do programa Xogade no exterior, agás os deportes náuticos e acuáticos federados, entre as 12:00 e as 18:00 horas nas zonas en alerta laranxa.
