A calor instáurase en Galicia ante as alertas dunha nova onda de calor. Seguindo a mesma liña, a Xunta de Galicia activa a alerta vermella por episodio de altas temperaturas no interior de Pontevedra durante o xoves. A previsión é que a situación se manteña en toda Galicia, co que as alertas permanecerían activas por posibles efectos adversos para a saúde durante varios días. O nivel laranxa chegará ao litoral pontevedrés, mentres que o amarelo afectará ao suroeste da Coruña e montaña de Ourense.
No caso do deporte, a Secretaría Xeral para o Deporte determinA a suspensión da actividade deportiva federada e do programa Xogade no exterior nas zonas afectadas pola alerta vermella. Por tanto, non se levará a cabo actividade deportiva federada e do programa Xogade no exterior, agás os deportes náuticos e acuáticos federados, entre as 12:00 e 20:00 horas do 2 de xullo no interior de Pontevedra e entre as 12:00 e 18:00 horas nas Rías Baixas.
Efectos sobre a saúde
A exposición a temperaturas excesivas pode provocar problemas de saúde como mareo, cansazo, debilidade, fatiga e cambras musculares, síncope, deshidratación, insolación e golpe de calor. A maioría das enfermidades asociadas á calor son consecuencia máis ou menos grave dun fallo no sistema de termorregulación.
A calor excesiva pode alterar as funcioós vitais se o corpo humano non é capaz de compensar as súas variacións de temperatura. Unha temperatura moi elevada produce perda de líquidos e de electrólitos, necesarios para o funcionamento normal dos distintos órganos. Ademais, os mecanismos de termorregulación poden verse descompensados nalgunhas persoas con determinadas enfermidades crónicas, sometidas a certos tratamentos médicos e con discapacidades que limitan a súa autonomía.
