Chegou o verán e sentirase con forza esta fin de semana. A Axencia Estatal de Meteoroloxía (Aemet) vén de confirmar a primeira onda de calor do ano, que disparará os termómetros de Galicia a partir desta fin de semana. A vaga comezará este sábado 28 de xuño e durará “a lo menos, ata o martes 1 de xullo”, informan dende a Aemet. E en Galicia? Romperanse as máximas históricas que acadaron Leiro e Ourense –con máis de 40 graos– hai menos de 10 días? “Todo apunta a que si, pero aínda é moi cedo para confirmalo, haberá que ver como evoluciona o tempo”, indican fontes de Meteogalicia.
Así, a primeira onda de calor vén dada por unha “masa de aire moi cálida e relativamente seca” procedente de África que se introducirá dende o sur pola Península, “polo que Galicia vivirá esta vaga un pouco máis tarde que o resto de territorios”. Asi o detallan dende a axencia galega. Tendo en conta que os avisos se formulan cunha marxe de 72 horas –é dicir ata tres días–, pódese comprobar que a Aemet xa rexistra alertas amarelas e laranxas para o venres nalgunhas comunidades do sur de España. No caso galego, “o máis seguro é que mañá xa se confirme algún aviso por temperaturas extremas para o sábado”, detallan dende Meteogalicia.
⚠️ AVISO ESPECIAL | Ola de calor
— AEMET (@AEMET_Esp) June 25, 2025
Un nuevo ascenso de las temperaturas da lugar al primer aviso especial por ola de calor de este verano.
A partir del sábado 28 las temperaturas serán claramente superiores a las normales.
+ info 👉
🔗 https://t.co/48Lsr8QC4f pic.twitter.com/5GewcF3PiE
Diferencias coa vaga de calor de comezos de xuño
Deste xeito, os termómetros irán subindo progresivamente en Galicia, segundo as predicións da axencia galega. En cidades como Ourense, as temperaturas máximas pasarán dos 31 graos para este xoves aos 37 graos para o sábado. Pola contra, en Vigo pasarán de 24 graos na próxima xornada aos 28 graos durante o primeiro día da onda de calor. “As temperaturas extremas notaranse a partir do sábado nos sitios habituais máis cálidos –zona do Miño, de Ourense, Valdeorras e sur de Lugo– e estarán ao redor do 40 graos”, explica a axencia galega.
E en que se diferenciará esta ola de calor daqueles días de altas temperaturas en Galicia a comezos deste mes? “De momento non hai moita diferenza, pero haberá que ver durante cantos días continuados vamos ter estes avisos por temperaturas extremas”, aclaran dende Meteogalicia. “Da outra vez, na zona de Miño e Ourense foron tres ou catro días seguidos de alertas, desta vez, poderían ser máis, pero é moi cedo para sabelo”, matizan. Agárdase que a próxima semana tamén sexa de moita calor en Galicia, “pero aínda non se sabe se o pico vai quedar na fin de semana ou baixará un pouco ou continuará coa mesma intensidade durante o luns e martes”, engaden.
