Únete á nosa canle de Whatsapp
Este mércores, a activista sueca Greta Thunberg saía de Estados Unidos a bordo do catamarán La Vagabonde, propiedade dunha parella australiana, para chegar a tempo ao Cumio do Clima que se celebrará en Madrid a partir do vindeiro 2 de decembro. Thunberg levaba desde finais agosto no país norteamericano, onde acudiu a outro encontro sobre o cambio climático na ONU, e tiña previsto viaxar a Chile, que ía acoller o cumio nun primeiro momento, desde alí. Porén, as protestas no país obrigaron a trasladar a reunión a España. E é posible que o iate no que viaxa a activista toque terra en Galicia. Así o recolle este martes Europa Press, citando a fontes do Concello da Coruña, que sosteñen que se está preparando un dispositivo para a chegada de Greta Thunberg nas vindeiras semanas. Outras fontes apuntan tamén cara a Vigo, algún punto da costa de Portugal ou Cádiz como outros dos lugares aos que podería chegar a embarcación.
We sail for home! pic.twitter.com/Mc5IoGpKXA
— Greta Thunberg (@GretaThunberg) November 13, 2019
Ao coñecerse o cambio de lugar do cumio, a moza, que se nega a viaxar en avión ou barcos que emitan gases causantes do efecto invernadoiro para desprazarse, lanzou unha petición a través das redes sociais, á que chegou a responder a ministra de Transición Ecolóxica do Goberno español, Teresa Ribera, ofrecendo a axuda que precisara. Finalmente, despois de valorar varias opcións, Greta Thunberg decidiu embarcarse no catamarán que saíu este mércores da costa estadounidense.
Greta Thunberg acadou fama mundial no último ano despois de que en agosto do ano pasado, despois dunha vaga de lumes en Suecia, iniciara unha folga escolar ata as eleccións suecas, para esixir aos gobernantes que actuasen fronte ás consecuencias do cambio climático e ás causas que o provocan. A protesta comezou a ter resposta entre a mocidade de moitas partes do mundo, con convocatorias de folga coñecidas como os Venres polo Clima ou Fridays for Future.
