Milleiros de persoas saíron á rúa en Galicia este venres para esixir medidas urxentes ante a emerxencia climática. As mobilizacións marcharon polo centro das principais cidades galegas, convocadas principalmente polos estudantes que participan no movemento mundial ‘Fridays for Future‘.
O Movemento Galego polo Clima difundiu un comunicado alertando da situación de “emerxencia climática” que padece o noso planeta e ante a inminente chegada a un “punto de non retorno” que mesmo comprometería a supervivencia da especie humana.
Máis de 70 colectivos e entidades participaron nas diferentes marchas na Coruña, Pontevedra, Vigo, Ourense, Lugo, Ferrol e Compostela. O estudante de Bioloxía Kai Baltrusch, portavoz do Movemento Galego polo Clima, n apuntou que este é “un momento histórico, sen precedentes”, no que respecta a a mobilización da mocidade na loita contra o cambio climático.
Aquí podes ver unha galería de imaxes do MGPC da concentración e marcha celebrada en Vigo na mañá deste venres.
