Nuria. Ese é o nome designado pola Axencia Estatal de Meteoroloxía (AEMET) para a nova borrasca de alto impacto que azoutará a península nas próximas horas. Situada ao oeste, Galicia será unha das zonas máis afectadas polo sistema de baixas presións. O prato máis forte será este mércores, coa entrada dunha fronte fría pola tarde que deixará fortes treboadas en todo o territorio. Ademais, acenderase a alerta amarela na costa noroeste da Coruña por mar de vento de forza 7. A inestabilidade será protagonista do escenario meteorolóxico galego ata, polo menos, o venres.
A borrasca Nuria deixará chuvias xeneralizadas en practicamente todo o Estado pero Galicia será unha das comunidades máis afectadas, xunto ao oeste de Castela e León, o oeste de Andalucía e Estremadura. É dicir, a fachada atlántica. Dende eltiempo.es indican que haberá precipitacións abundantes nestes puntos, con posibilidade de fortes treboadas, e tamén intensos refachos de vento. Polo momento, as alertas en Galicia circunscríbense a este mércores no noroeste da Coruña pero poderían ampliarse nas próximas horas.
O tempo continuará moi inestable nos próximos días, malia que non se producirá un forte descenso das temperaturas debido á masa de aire subtropical que impulsa a borrasca Nuria. Así, os valores máximos de cara aos próximos días roldarán os 20 graos.
Días moi primaverais
O sistema de baixas presións irase desprazando cara ao suroeste peninsular ao longo do xoves, polo que o seu impacto en Galicia irase reducindo. Aínda será un día marcado por unha profunda inestabilidade e chuvascos localmente tormentosos, sobre todo na metade sur e no interior. En canto ao venres, predominarán as precipitacións e os ceos anubrados. De cara á fin de semana, Galicia estará situada nunha zona intermedia entre as altas e as baixas presións, polo que se agardan días moi primaverais. É dicir, con nubes e claros e probabilidade de chuvascos intermitentes.
