Temperaturas baixo cero e alerta amarela en boa parte das provincias de Ourense e Lugo. Ese é, a grandes trazos, o resumo dunha semana marcada polo frío e o tempo estable en Galicia. Mais este escenario está a piques de cambiar radicalmente. O anticiclón que bloqueaba a entrada de borrascas comezará a debilitarse o sábado e iso favorecerá a apertura do corredor atlántico. É dicir, a fácil entrada dos sistemas de baixas presións polo oeste da península. O domingo chegarán as primeiras chuvias, que se prevén intensas e con acumulados de ata 100 l/m2 en cinco días, sobre todo no suroeste galego. O escenario non prevé cambiar a curto prazo e as probabilidades de chuvia ata o sábado 25 de xaneiro mantéñense no 90%.
Segundo explican nun artigo publicado en Meteored, esta fin de semana desenvolverase unha profunda borrasca nos arredores das illas Azores. Aínda que esta posición está máis ao sur do habitual, irá desprazándose cara ao leste e perdendo intensidade. Porén, a achega de aire frío, así como o encontro con masas de aire cálido do norte de África, alimentarán a borrasca, que chegará moi activa o martes. De feito, o luns en Galicia será un día de transición, son chuvias máis probables nas últimas horas do día. Porén, o 21 agárdanse precipitacións abundantes tanto en Galicia como no norte de Portugal.
O oeste de Galicia, a zona máis afectada
Meteogalicia corrobora este prognóstico, ao indicar na súa páxina web que a vindeira semana estará marcada pola inestabilidade. As borrascas atlánticas dominarán o escenario atmosférico e a probabilidade de precipitacións será moi elevada, polo menos, ata o sábado. A zona máis afectada será a metade oeste do territorio, por onde entrarán as frontes asociadas ás borrascas atlánticas. Malia as precipitacións, os valores estabilizaranse e agárdase que se experimenten temperaturas suaves pero maiores que as desta semana. O ascenso será máis significativo nos valores mínimos que nos máximos.
Outros servizos de meteoroloxía, como eltiempo.es, tamén advirten da chegada dunha profunda borrasca dende o Atlántico a comezos de semana, polo que as xeadas propias destes días e os avisos por baixas temperaturas desaparecerán. “A semana do 20 ao 27 de xaneiro prevese moi chuviosa en todo o oeste peninsular, cun superávit de 10 a 30 l/m2 na metade oeste de Galicia, Castela e León, Madrid, Estremadura, Castela A-Mancha e Andalucía”, apuntan dende Meteored. As baixas presións predominarán toda a semana, sen data —dada a inherente incerteza dos prognósticos meteorolóxicos— da chegada do anticiclón e, por tanto, do tempo estable.
