20 graos de diferenza en 12 horas: Galicia vive unha fin de semana de oscilación térmica

O mes de maio está a piques de chegar á súa fin e a primavera entra na súa recta final. Con todo, o tempo das últimas semanas non parece presaxiar a chegada do verán. Con chuvias intermitentes, nevaradas nas zonas de montaña, temperaturas que non superan os 20 graos e a predominancia dos ceos nubrados, Galicia dálle, por fin, a benvida ao anticiclón. Porén, as altas presións desta fin de semana non serán sinónimo de calor. Malia que o venres se chegará aos 28 graos en Ourense, e o resto de cidades galegas estarán arredor dos 23 graos de máxima, entre sábado e domingo os valores volverán estar por debaixo dos 20 graos. O que máis destaca desta fin de semana é a oscilación térmica: nun abano de tan só 12 horas, os termómetros baixarán dos 28 aos 8 graos en Ourense; e dos 24 aos 4 graos en Lugo. No resto de cidades, haberá entre 10 e 15 graos de difereenza entre o día e a noite.

Segundo o prognóstico de Meteogalicia, o día máis estable de toda a fin de semana será este venres, cando dominen claramente as altas presións e se acaden os 28 graos en Ourense, chegando a unha temperatura máis propia desta época do ano. O resto de cidades galegas estarán entre os 23 e os 24 graos de máxima e roldando os 10 de mínima. Estes valores afástanse considerablemente do prognóstico que se agarda para o resto da península, especialmente no sur, cando se esperan temperaturas que acaden os 35 graos. O meteorólogo Mario Picazo explica no portal eltiempo.es que os termómetros non ascerán tanto en Galicia e, en xeral, na cornisa cantábrica, porque segue habendo aire frío en altura e en superficie, que non se retirará de todo pese á chegada do anticiclón.

Publicidade

Volve a inestabilidade

De feito, Galicia recuperará a inestabilidade durante o sábado, cando está previsto que entre unha fronte debilitada polo litoral atlántico que vai deixar precipitacións, sobre todo, durante a tarde. Agárdase que os ceos estean moi nubrados en todo o territorio, agás nas montañas de Lugo e Ourense. Segundo Meteogalicia, é probable que haxa chuvias febles e orballo que serán máis probables no litoral atlántico e nas horas centrais do día. No que respecta ás temperaturas, volverán experimentar un acusado descenso, que as levará a roldar os 20 graos. De feito, en Santiago non se agardan máis de 15 graos de máxima. No outro extemo estará Ourense, que rozará os 23, a máxima de todas as cidades galegas. De novo, volve haber unha importante oscilación térmica, dado que as temperaturas nocturnas estarán arredor do 10 graos.

A situación atmosférica será moi semellante o domingo, cando xa pase a fronte pero quede en Galicia moita humidade. Isto provocará ceos nubrados en todo o territorio e chuvias febles, que serán máis probables no noroeste. As temperaturas tampouco experimentarán cambios significativos respecto ao sábado e volverán roldar os 20 graos de máxima e os 10 de mínima. Con todo, parece que Galicia recuperará a estabilidade durante o comezo da vindeira semana. De feito, o servizo meteorolóxico galego agarda que as altas presións entren progresivamente a partir do luns, con ceos que estarán cada vez máis despexados conforme avance a xornada e se rexistre un aumento lixeiro das máximas. En relación ao resto da semana, a previsión é que continúe o tempo estable e as temperaturas sexan máis acordes á época do ano.

Publicidade