O Aquarium Finisterrae recibiu un valioso exemplar da primeira edición da novela 20.000 leguas de viaxe submarina escrita por Xulio Verne en 1869. Trátase dunha publicación en castelán da que só hai 12 exemplares catalogados en todo o mundo. O singular exemplar foi cedido pola Asociación Amigos da Casa das Ciencias para a súa exhibición.
Este libro expoñerase na sala Nautilus do acuario coruñés para divulgar a relevancia do seu contido desde unha perspectiva histórica e educativa. Servirá para profundar nas perspectivas culturais que caracterizan os contidos da Sala Nautilus, xa que ademais dun relato de ciencia ficción, o libro é tamén unha obra de divulgación científica dun dos pioneiros deste xénero literario. De feito, nas súas páxinas pódense ler descricións de seres vivos, instrumentos científicos, fenómenos naturais e noticias sobre os descubrimentos da época. Tamén inclúen predicións sobre o futuro tecnolóxico da humanidade e reflexións sobre as implicacións éticas do progreso científico, tan oportunas entón como na actualidade.
Unha novela de referencia para o Aquarium
A novela é a referencia que seguiu o Aquarium Finisterrae para transformar o seu oceanario nun exercicio de imaxinación que converte a súa sala de observación no Nautilus e onde se recrea o escenario desde onde o capitán Nemo gobernaba o seu submarino. Por iso na sala exponse unha colección de obxectos orixinais da segunda metade do século XIX e que, dunha ou outra forma, teñen relación con este personaxe. A mostra inclúe un cabeiro de narval, unha diversidade de cunchas como as de tridacna, nautilus, anteollos, aparellos náuticos e científicos, cartas de navegación e obxectos que calquera lector atento poderá recoñecer.
