De todos os espazos do Aquarium Finisterrae, o máis espectacular é a Sala Nautilus, segundo os seus propios traballadores.
A sala foi deseñada para ofrecer unha “experiencia emocional única”. Atópase somerxida baixo unha piscina de ata cinco millóns de litros de auga e, grazas á súa decoración e ambientación, os visitantes viaxan no tempo e no espazo ata o gabinete do capitán Nemo, comandante do submarino Nautilus e un dos personaxes máis interesantes da icónica novela de Julio Verne 20.000 leguas de viaxe submarina.
Como prisioneiro do capitán Nemo, Pierre Aronnax viaxou a bordo do Nautilus descubrindo lugares exóticos e inimaxinables. A casualidade quixo que Vigo fora un deles, compartindo lista de destinos percorridos coa Antártida e as illas da Polinesia. A Illa de San Simón, o botín da batalla de Rande que o capitán atopou na ría… a mente do escritor francés contaxiouse das paisaxes e lendas galegas.
É seguro que Aronnax, como biólogo, houbese gozado moitísimo percorrendo a sala do Aquarium. O seu entusiasmo pola vida mariña sería, sen dúbida, benvido neste moderno Nautilus. De igual xeito que no submarino, ao redor das estancias só hai auga. Non auga escura, senón chea de vida e cores. Quenllas, corvinas, seriolas, douradas, robalizas ou meros rodean incansablemente os cristais que separan visitantes de habitantes dentro do acuario xerando unha sensación —cada vez máis profunda— de irrealidade, de somerxirse de a poucos nesa historia de monstruos mariños e aventuras.
Como será para eles vivir dentro deste relato atemporal? Os traballadores do acuario quixeron trasladar esta nova perspectiva gravando un vídeo dende dentro da piscina. Este é o resultado.
