O Aquarium Finisterrae acollerá o vindeiro sábado 1 de febreiro a VII Feira de Ciencia Isabel Zendal, que despregará nas salas do museo 14 obradoiros divulgativos impartidos por profesorado da Universidade da Coruña (UDC). Dende os Museos Científicos Coruñeses, que inclúen a Casa das Ciencias e a Domus, describen o evento como “unha oportunidade para descubrir e aprender ciencia”.
A feira incluirá xornada de portas abertas con entrada gratuíta ao Aquarium. Para participar nos talleres é preciso reservar entradas. Poderase facer a partir das 9 horas do mércores 29 de xaneiro nesta ligazón. Para facilitar o acceso ás persoas maiores de 65 anos, estas poderán acceder sen reserva, acompañadas doutra persoa se o necesitan.
As persoas que desenvolverán as actividades estarán caracterizadas como os protagonistas da expedición da vacina, da que toma nome esta feira. Ana González Tizón e Andrés Martínez Lage farán de Isabel Zendal e Francisco Balmis, mentres que os alumnos e alumnas serán os nenos que se vacinaron.
Saúde, bioloxía… e peixes!
A feira incluirá 14 talleres divulgativos sobre algúns dos grupos animais máis característicos que se poden ver no Aquarium Finisterrae como peixes, polbos, quenllas e cangrexos ademais doutros temas sobre saúde e bioloxía. A continuación podes consultar todos os obradoiros, que se celebrarán en horario de 11 a 14 horas e de 16 a 18.30 horas. Están dirixidos ao público xeral:
- Súper quenllas. Presentación da quenlla de Groenlandia, un peixe cartilaxinoso cunhas características xenéticas e fisiolóxicas que lles fai parecer uns superheroes.
- Doutor Octopus. Os polbos son mestres da camuflaxe, cambian de cor con habilidade ante determinadas situacións, adaptándose ao fondo mariño pasando desapercibidos para outras especies. Neste taller explicarase como, cando e por que se camuflan.
- Un curioso mexicano. A especie Ambystoma mexicanum é un un animal sorprendente. Mediante xogos e crebacabezas proponse descubrir que é a neotenia, o curioso proceso que o fai tan especial.
- Peixes mutantes. Proponse ao público crear o seu propio peixe mutante.
- Don cangrexo. Un taller sobre como viven os cangrexos, a súa anatomía, bioloxía e os seus cromosomas.
- Editando xenomas. Explicación da tecnoloxía CRISPR-Cas9, utilizada en xenética e bioloxía molecular e que permite cambiar o ADN dun organismo.
- Telómero e telomerasa. Explicarase como funcionan os telómeros, rexións dos cromosomas que garanten a estabilidade dos xenomas, e que son responsables do envellecemento.
- Garda o equilibrio! Describirase o centro de gravidade e a súa importancia para manter o equilibrio, explorando a estabilidade das embarcacións.
- Vacinas e vitaminas. Un taller para descubrir que son e como funcionan as vacinas, e o papel dos anticorpos e o sistema inmune.
- Viralízate. Para coñecer que son os virus, como funcionan, como infectan os seus hospedadores. Son ou non seres vivos?
- Toma vitamina! O papel da vitamina C no funcionamento do organismo e determinación da cantidade presente nalgúns alimentos.
- Pequenos cambios, grandes impactos. Como se reparan as mutacións no ADN e cales son as súas consecuencias.
- Taller de enfermería. Reanimación cardiopulmonar básica, primeiros auxilios de feridas, conceptos básicos de nutrición, calzado saudable, antropometría e morfoloxía do pé, estudo das presións plantares.
A feira está organizada por UDCiencia d+i, un grupo de divulgación científica e innovación docente da Universidade da Coruña, en colaboración co Aquarium Finisterrae. Leva el nombre de Isabel Zendal como homenaxe á Real Expedición Filantrópica da Vacina, que partiu do porto da Coruña o 30 de novembre de 1803.
A Universidade da Coruña é a UDC. A USC é a de Compostela. Corrixide a nova, por favor