Coñecer os coidados das focas do Aquarium, observar con detalle as impresionantes imaxes do telescopio James Webb e sesións de cine sobre o astronomía e arqueoloxía son algunhas das posibilidades que ofrecen os Museos Científicos Coruñeses para esta e calquera fin de semana do mes, ademais do resto de exposicións de cada un dos edificios. As programacións do Aquarium, a Casa das Ciencias e a Domus perseguen divulgar o coñecemento cientifíco para todos os públicos e, por iso, son perfectas para unha plan diferente coa rapazada.
Aventura coas focas (Aquarium)
En marzo remata a primeira quenda trimestral do ano de “Aventura coas focas”, para o que se debe acudir con reserva previa —sen custe adicional ao abono base de 10 euros—. É un taller de divulgación científica con longa tradición no Aquarium que achega a rutina diaria das focas que viven nas piscinas exteriores. Durante os 90 minutos de actividade as persoas participantes coñecerán desde dentro os coidados destes animais mariños: visitarán a cociña do Aquarium, participarán na preparación dos alimentos e accederán ás plataformas exteriores onde se alimenta e revisa o estado destes mamíferos mariños.
“Aventura coas focas” celébrase todas as fins de semana entre as 11.00 e as 12.30 con doce prazas por sesión. A actividade está dirixida a maiores de 7 anos, que deberán acreditar a súa idade con DNI ou fotografía do libro de familia onde figure o nome e a data de nacemento. Os nenos e nenas deberán ir acompañados durante toda a actividade por unha persoa adulta que se fará cargo dun máximo de dous menores.
A través do James Webb (Casa das Ciencias)
A Coruña xa presume de ter unha mostra do avance científico do 2022 segundo a revista Science: o Telescopio James Webb. Desde o mes pasado, a Casa das Ciencias presenta na súa planta baixa unha selección de nove fotografías capturadas por este aparello, con sete veces máis superficie que o seu predecesor, o Hubble. Calquera que se achegue poderá ver, entre outros, o nacemento dunha estrela no centro dunha nube de gas e po con forma de reloxo de area e unha perspectiva de Xúpiter na que se aprecian as súas características franxas horizontais, os seus aneis ou os seus satélites.
Cine no Planetario e na Domus
Os Museos Científicos da Coruña tamén contan coas súas propias carteleiras, coma se de un cine se tratase. Durante todo o mes de marzo, os sábados, domingos e festivos o Planetario da Casa das Ciencias ofrecerá unha programación para todo o día. As entradas só se poden adquirir na recepción o mesmo día da sesión por un suplemento adicional de 2 euros sobre o precio base, tamén 2 euros. Para os máis previsores, o último sábado de marzo o Planetario ofrece dúas sesións especiais que substitúen os pases das dúas primeiras películas do día.
- 11.30. A noite é necesaria. Maiores de 10 anos; excepto último sábado do mes
- 13.00. O ceo de Cloe. De 4 a 6 anos; excepto último sábado do mes
- 17.00. Polaris. Maiores de 7 anos
- 18.00. Lévame á Lúa. Maiores de 10 anos
Por outra banda, a Domus ten o seu propio catálogo de contidos audiovisuais para facer accesible a historia a todos os públicos. En busca del primer europeo (pases ás 12.00 e ás 17.00) é unha viaxe científica con moito humor e aventuras no que Luís Quevedo dá vida a un mozo que busca respostas, e Eudald Carbonell, científico e codirector dos xacementos de Atapuerca, a un eminente paleontólogo. A outra opción, The Melting Point: A desaparición dos glaciares pirenaicos (documental gañador do Prisma 2021 ao mellor vídeo) proxéctase ás 13.00 e ás 18.00.
