A finais do ano pasado, a revista Science escolleu o Telescopio Espacial James Webb como o avance científico do 2022. Este proxecto, liderado pola NASA e coa colaboración das axencias espaciais europea e canadense, comezou a capturar o pasado verán espectaculares instantáneas de enorme interese  científico. 

En comparación co seu predecesor, o Telescopio Espacial Hubble, o espello principal do James Webb, recuberto de ouro, ten sete veces máis superficie, o que lle permite detectar obxectos moito máis febles e acadar moita máis resolución nas imaxes. Ademais, dispón de instrumentos optimizados para captar a radiación infravermella que desprenden os obxectos do ceo. Deste xeito pode escrutar moito máis lonxe e, polo tanto, acceder a  eventos máis remotos no tempo como, por exemplo, o nacemento das primeiras estrelas e galaxias.  

Agora, a Casa das Ciencias presenta na súa planta baixa unha colección de nove desas extraordinarias imaxes nas que se poden observar, por exemplo, o nacemento dunha estrela no centro dunha nube de gas e po con forma de reloxo de area; unha perspectiva de Xúpiter na que se aprecian as súas características franxas horizontais, os seus aneis ou os seus satélites; o bordo da nebulosa de Carina, que lembra unha paisaxe montañosa baixo o ceo nocturno; ou a galaxia do Abano, cunha extraordinaria definición dos seus  brazos espirais.