Luns 4 Marzo 2024

O investigador Álvaro Ordoñez gaña o premio á mellor tese de teledetección

O científico da USC abordouo desenvolvemento de algoritmos eficientes para aliñar automaticamente imaxes multi e hiperespectrais

Álvaro Ordóñez, investigador colaborador do Centro Singular de Investigación en Tecnoloxías Intelixentes da USC (CiTIUS) recibe este venres o premio á mellor tese de teledetección de 2021. Na sexta edición destes galardóns que concede o capítulo español do IEEE-GRSS (Sociedade de Xeociencia e Teledetección) do IEEE (Institute of Electrical and Electronics Engineers, asociación mundial de enxeñeiros dedicada á normalización e o desenvolvemento en áreas técnicas), o xurado quixo remarcar a calidade dos traballos presentados, destacando que “supuxeron interesantes achegas ao campo científico da computación, así como ao do sensado remoto”.

“Sempre é gratificante que recoñezan o teu labor, e especialmente cando se trata dun premio á túa tese, xa que se trata dun traballo de investigación de varios anos”, conta Álvaro Ordóñez. O investigador reflexiona tamén sobre o valor do traballo en equipo. “Vexo o premio como un recoñecemento non só a nivel persoal, senón grupal, xa que nunha tese os directores teñen tamén un papel importante, e ao final o premio é un indicador de que estamos no bo camiño”, explica.

Publicidade

Aproveitar a riqueza dos datos

A tese de Álvaro Ordóñez, titulada Efficient Registration of Multi and Hyperspectral Remote Sensing Images on GPU e dirixida polos profesores da USC Dora Blanco, investigadora vinculada do CiTIUS, e Francisco Argüello, abordou durante os últimos anos o desenvolvemento de algoritmos eficientes para aliñar automaticamente imaxes multi e hiperespectrais de teledetección.

A idea orixinal xurdiu da necesidade de dispoñer de algoritmos que permitisen aproveitar a gran cantidade de información contida neste tipo de imaxes: tratábase de desenvolver ferramentas capaces de procesar a enorme cantidade de datos que se captura diariamente sobre o planeta, tanto dende satélites como dende UAVs (drons) ou avións. “Para sacar partido de toda esa información, temos que aliñar imaxes tomadas en distintas datas e desde distintas plataformas, en multitude de aplicacións… por exemplo, para realizar agricultura de precisión, ou para observar a evolución de catástrofes naturais”, explica Álvaro.

A investigación realizada durante esta tese quedou plasmada na publicación de diversos algoritmos que son quen de aproveitar a información espectral e espacial para obter aliñamentos mellores e, ademais, facelo nun tempo de computación moi reducido, grazas ás implementacións paralelas realizadas en GPUs NVIDIA e clústers de computación de altas prestacións.

O acto de entrega dos premios terá lugar este venres, 3 de marzo, ás 17.00 horas, ao longo dun evento en liña, no que os premiados realizan unha breve retrospectiva das súas carreiras académicas e liñas de investigación.

DEIXAR UNHA RESPOSTA

Please enter your comment!
Please enter your name here

Este sitio emprega Akismet para reducir o spam. Aprende como se procesan os datos dos teus comentarios.

Relacionadas

Un proxecto galego impulsa a sustentabilidade do sistema alimentario a través da IA

O proxecto no que participan USC e UVigo acometerá a crise do sector co apoio do Programa Marco ‘Horizonte Europa’

As mulleres protagonizaron anuncios de banca antes de poder abrir libretas de aforro por si soas

Un estudo da USC analiza os roles femininos nas ilustracións e fotografías utilizadas na publicidade bancaria entre 1949 e 1970 en España

Gciencia celebra o Día da Lingua Materna cun relatorio sobre a divulgación en galego

A xornalista Laura Filloy abordou a importancia de trasladar o coñecemento científico á sociedade nun acto celebrado no Campus de Lugo da USC
00:05:02

Poñer a roupa ao clareo do Sol, funciona?

É unha técnica tradicional para branquear a roupa que seguimos empregando hoxe. A ciencia confirma a eficacia dos raios solares como o mellor desinfectante natural