A atención veterinaria diaria no Aquarium Finisterrae aplica coidados a todos os animais, desde os de maior tamaño, como as lobos mariños, ata os máis pequenos, como os peixes pallaso. Así, o pasado mes de xuño, un exemplar de cabaliño de mar de oito centímetros nado na Casa dos Peixes, da especie Hippocampus guttulatus, tivo que ser intervido cirurxicamente para mantelo con vida.
Presentaba unha malformación de nacemento no abdome, un orificio polo que se lle saían os órganos internos. Nunha primeira intervención introducíronselle as vísceras no seu interior e pechouse o buraco. Uns días despois, tras cicatrizar a ferida, someteuse a unha segunda operación na que se lle retiraron os puntos. Ambas intervencións tiveron que realizarse coa axuda dunha lupa debido ao pequeno tamaño do peixe.
Unha vez que se comprobou que se movía con normalidade e que estaba recuperado, devolveuse ao tanque co resto dos exemplares da súa especie. O proceso está recollido neste vídeo.
