Os Museos Científicos Coruñeses celebran este domingo 4 de novembro unha xornada sobre micoloxía, con entrada libre e gratuíta e aberta a todos os públicos. A actividade desenvolverase de 11 a 14 e de 16 a 19 horas, e terá lugar na sala de actividades da Casa das Ciencias, no edificio que está na entrada do Parque de Santa Margarita pola rúa Padre Sarmiento.
Durante a xornada abordaranse diversos aspectos da micoloxía, con obradoiros dirixidos por estudantes universitarios da asociación UDCbigbang e coa colaboración do Grupo Micolóxico Galego. Ademais, haberá unha exposición das especies de cogomelos máis representativos do momento. As actividades están deseñadas para que as persoas pouco familiarizadas con esta disciplina poidan achegarse por primeira vez a ela.
Os obradoiros serán os seguintes:
– Fungos microscópicos no día a día. Observación de fermentos e preparacións microscópicas de diferentes especies de fungos.
– Caderno de campo: diferentes formas no mundo dos fungos. Traballarase cunha maqueta, e propoñerase a realización de debuxos e modelado en plastilina.
– Gabinete do micólogo. Conservación de exemplares, reactivos químicos, detalles con lupa e microscopio, claves dicotómicas.
– Comestible ou tóxica? Mediante imaxes impresas dos cogomelos máis velenosos e as súas posibles confusións convidarase ao público á identificación e recoñecemento de diferentes características. Tipos de intoxicación.
