Se che gustan as criaturas mariñas, esta é unha actividade para ti. Proximamente, o Aquarium Finisterrae iniciará «Aventura coas focas», é un taller de divulgación científica no que se participa na preparación dos alimentos e accédese ás plataformas exteriores onde se alimenta e revisa o estado destes mamíferos.

A actividade está dirixida a persoas maiores de 7 anos, que deberán acreditar a súa idade con DNI ou fotografía do libro de familia onde figure o nome e a data de nacemento. Os nenos e nenas deberán ir acompañados durante toda a actividade por unha persoa adulta que se fará cargo dun máximo de dous menores.

Esta actividade non ten custo engadido ao prezo que cada visitante deba abonar para entrar no recinto, pero require a reserva de entradas para todas as persoas participantes. Polas características da actividade, ofértanse só 12 prazas en cada sesión. No segundo trimestre deste ano haberá 19 sesións, o que supón un total de 228 prazas. O próximo luns ás 10.00 horas abrirase a venta de entradas para as sesións de abril, maio e xuño.