Unha nova estratexia para mellorar o tratamento de cancro de ovario resistente. Este é o obxectivo do proxecto OVERCAD do que forma parte o consorcio galego SunRock Biopharma e que vén de recibir do Ministerio de Ciencia, Innovación e Universidades un importe de máis de 1,8 millóns de euros. En colaboración co Instituto de Oncoloxía de Vall d’Hbron (VHIO) desenvolverán novos anticorpos para mellorar os resultados das terapias en pacientes con esta doenza.
O cancro de ovario é o sétimo máis frecuente en mulleres en todo o mundo e un dos tipos xinecolóxicos con maior mortalidade. A pesar dos avances nos últimos anos, o tratamento segue sendo complexo, debido ao seu diagnóstico frecuente en etapas avanzadas e á resistencia que presentan as pacientes aos tratamentos convencionais. “Isto pon de manifesto a urxente necesidade de identificar novas alternativas terapéuticas para mellorar as opcións de tratamento e a supervivencia das pacientes”, destacan dende o consorcio, cuxa sede está no Biopolo Sionlla de Santiago de Compostela.
Tanto SunRock Biopharma como o VHIO participan conxuntamente no proxecto OVERCAD, cuxo obxectivo é desenvolver unha nova estratexia terapéutica eficaz para o tratamento desta doenza, centrada nun anticorpo conxugado a fármaco (Antibody Drug Conjugate, ADC) dirixido á diana CCR9 (Receptor de Quimioquinas 9). A finalidade é mellorar os resultados terapéuticos neste grupo de pacientes.
Un anticorpo eficaz e seguro
Ambas entidades traballarán sobre este método para acelerar a dispoñibilidade dunha nova terapia máis eficaz e segura para as doentes. “Este innovador anticorpo demostrou unha sólida eficacia antitumoral e un perfil de seguridade prometedor en modelos preclínicos, ofrecendo un enfoque terapéutico que non só mellora o tratamento deste tipo de cancro, senón que tamén contribúe a reducir os efectos secundarios e a minimizar a aparición de resistencias“, aseguran dende o consorcio galego.
O consorcio liderado por SunRock Biopharma e VHIO combina a experiencia de SunRock no desenvolvemento de anticorpos terapéuticos innovadores co coñecemento especializado de VHIO. Este estará representado polo Grupo de Neoplasias Xinecolóxicas, liderado pola doutora Ana Oaknin, “que achega unha sólida traxectoria no desenvolvemento de novas terapias moleculares e inmunolóxicas para o tratamento de neoplasias xinecolóxicas, sendo unha das investigadoras máis citadas a nivel mundial na súa área”, destacan. Ademais, o consorcio conta coa participación do equipo dirixido polo doutor Josep Villanueva, investigador do grupo de Proteómica do VHIO, “con ampla experiencia na identificación de biomarcadores tumorais de predición de resposta en pacientes”.
