Un equipo de facultativos e residentes da Área Sanitaria de Vigo vén de publicar un traballo no que descobren un biomarcador para a miopatía necrotizante inmunomediada (MNIM), unha enfermidade inflamatoria que afecta os músculos, debilitándoos de maneira rápida e progresiva e que pode derivar na morte da persoa que a padece.
A investigación determina que unha excesiva presenza da molécula MHC de Clase 1 (MHC-1) en biopsias realizadas a tecidos de pacientes coa enfermidade pode ser interpretada como un biomarcador de prognóstico da miopatía necrotizante inmunomediada. Isto, segundo reflicte o estudo, facilitaría “unha intervención temperá e dirixida que podería modificar o curso desta enfermidade”.
Firmado por residentes de segundo ano da Área de Vigo
O traballo, titulado TO-05 Miopatía Necrotizante y Complejo Mayor de Histocompatibilidad: una puerta a la medicina de precisión, está asinado polos doutores Xoel Otero Dávila, Silvia Dopazo Sotillo e Juan José Vázquez Castro. Todos son residentes de segundo ano da Área Sanitaria de Vigo. O traballo estivo supervisado polas doutoras Marina Ávila Núñez e Ana Argibay e o doutor Julián Fernández Martín. Ademáis, tamén formou parte da investigación a doutora Beatriz Sanmillán do Servizo de Anatomía Patolóxica.
A publicación baséase nun traballo desenvolvido a partir dun estudo retrospectivo realizado en Vigo entre 2018 e 2024 sobre 11 pacientes —6 mulleres e 5 homes— con miopatía necrotizante inmunomediada, avaliándose múltiples variables, incluíndo epidemioloxía, probas complementarias e terapias para determinar a súa relación con mal prognóstico.
Primeiro premio
O xurado da Sociedade Española de Medicina Interna (SEMI) outorgou o primeiro premio ao mellor abstract a esta investigación durante a celebración da XVII Reunión do Grupo de Enfermidades Autoinmunes Sistémicas que recentemente foi celebrado en Málaga. O xurado destacou o estudo por “abrir o paso ao tratamento desta doenza dende un enfoque da medicina de precisión“.
Así mesmo, un dos autores deste traballo, o doutor Xoel Otero, indica que é “un primeiro paso para tratar de demostrar esta hipótese na que continuaremos traballando e aumentado a actual base de datos de pacientes”. Actualmente, son un total de 12 persoas con esta patoloxía na Área Sanitaria de Vigo.
