Plantas con capacidade de resistir enfermidades. É o obxectivo dun proxecto europeo liderado por Beatriz Orosa, investigadora do Centro Singular de Investigación en Química Biolóxica e Materiais Moleculares da USC (CIQUS). O campo de traballo será a ferruxe da cebada, un fungo común que forma pústulas vermellas nas súas follas e que causa estragos nos cultivos.
A meta é identificar as respostas das plantas ante axentes patóxenos para tratar de potenciar estes mecanismos. Orosa dedica parte das súas tarefas desde hai anos ao estudo da inmunidade das plantas, especialmente ao sistema de ubiquitinación. Desencadéase cando a ubiquitina, unha pequena proteína que actúa como etiqueta molecular, modula a resposta inmune das plantas ao unirse a outras proteínas para degradalas ou darlles unha nova potencialidade.
O proxecto SynUbL encabezado pola investigadora Beatriz Orosa detense na ligasa E3, unhas encimas que identifican con precisión as proteínas que deben ser marcadas con ubiquitina para, desta forma, asegurar que o proceso se desenvolva de forma controlada e selectiva.
“Imos estudar como as plantas foron mellorando a súa resposta de defensa contra novos patóxenos ao longo da evolución mediante o roteiro da ubiquitina e utilizar este coñecemento para crear encimas sintéticas que axuden a mellorar a resposta dos cereais a patóxenos aos que aínda son susceptibles”, explica a investigadora.
Ferruxe da cebada
O comportamento das ligasas E3 activadas durante a resposta inmune da planta será analizado en episodios de ferruxe da cebada. Pero non só iso, senón que deseñarán novas ligasas a través de bioloxía sintética con máis capacidade para activar a planta contra as proteínas do patóxeno.
Unha mellora na capacidade inmunitaria das plantas que pode ser clave para combater pragas e patóxenos, que provocan a perda do 40% da produción agrícola mundial cada ano. “Sempre me fascinou a capacidade das plantas para percibir, anticipar e responder rapidamente os cambios ambientais e aos patóxenos“, sinala Orosa.
