O ciclo #conversasCINBIO, organizado polo Centro de Investigacións Biomédicas da Universidade de Vigo e GCiencia, celebra este martes 22 de xuño o cuarto encontro da serie. Neste caso, o entrevistado será David Posada González (Vigo, 1971), catedrático de Xenética na UVigo e líder do grupo de investigación Filoxenómica, enmarcado dentro da área de Medicina Molecular do CINBIO. A conversa poderá seguirse a través de gciencia.gal e as redes sociais de GCiencia e CINBIO.
Posada é licenciado en Bioloxía (1994) pola Universidade de Santiago de Compostela e doutorado en Zooloxía (2001) pola Universidade Brigham Young (Estados Unidos). Desde o ano 2011, é catedrático de Xenética na universidade viguesa. O seu traballo de investigación caracterízase pola multidisciplinariedade, combinando conceptos e ferramentas da bioloxía, estatística e informática. É autor de máis de 150 artigos en revistas de alto impacto e foi citado máis de 60.000 veces, que o levaron a nomealo como un dos investigadores máis citados do mundo (highly cited author) durante 14 anos consecutivos.
Filoxenómica
O grupo de Filoxenómica, liderado por Posada, está centrado de maneira xeral na evolución molecular de xenomas, células, poboacións e especies. Entre outras aplicacións, utilizan información xenómica para estudar a filoxeografía unicelular do cancro, co obxectivo de construír un marco teórico e metodolóxico para entender mellor os procesos de evolución desta enfermidade. Tamén analizan a xenómica evolutiva das células tumorais circulantes (CTCs), estreitamente relacionadas cos procesos de metástase. Recentemente, no marco da pandemia da Covid-19, o equipo colabora en consorcios nacionais e internacionais que estudan a epidemioloxía molecular e a transmisión do SARS-CoV-2 mediante a secuenciación de xenomas do virus.
O encontro con Posada sucede así ás conversas cos investigadores do CINBIO que protagonizaron Miguel Correa, Ana Gago e Jacobo de Uña. O vindeiro 29 de xuño, #convesasCINBIO pecharase coa entrevista con Isabel Pastoriza, coordinadora do grupo FunNanoBio, especializado na síntese e modificación de nanopartículas con propiedades singulares.
