A spin-off da USC TasteLab, unha iniciativa empresarial xerminada no campus de Lugo e que xa se ten convertido en referente no eido da análise sensorial de alimentos e bebidas en toda España, celebrará este xoves, a partir das 18.00 horas, na súa sede do número 2 da rúa Vázquez Seijas de Lugo, un evento aberto á participación de persoas interesadas en sumarse ao seu panel de catadores.
As persoas que integran o equipo de catadores de que xa dispón TasteLab son as encargadas de responder, a través da aplicación de análises sensoriais e da identificación duns parámetros concretos, as causas ou motivos polos que un produto triunfa ou non entre a xente.
Os responsables de TasteLab son coñecedores do importante labor que desenvolve o panel de catadores. Daquela, esta spin-off da USC busca agora ampliar o seu equipo de catadores, con persoas interesadas e motivadas en participar neste proceso de análise sensorial. A campaña está especialmente orientada a persoas que teñan paixón por degustar novos produtos, experimentar e recoñecer sabores, e que logo estean dispostas a dar a súa opinión ao respecto.
Entre outros aspectos, TasteLab analiza as causas polas que un produto triunfa ou non no mercado
Na procura de novas candidaturas para sumarse ao panel de catadores de TasteLab, esta empresa de análise sensorial, ofrece un traballo gratificado cunha duración semanal de dúas horas. As funcións deste cometido consisten principalmente en dar unha opinión obxectiva e honesta, traballar cun equipo de analistas para compartir opinións e avanzar cara a decisións de consenso. O desenvolvemento deste proceso require do emprego dun vocabulario claramente definido que permita describir os produtos e que axude á discriminación entre eles.
As persoas interesadas en participar e, no seu caso, sumarse ao panel de cata que xa ten en marcha TasteLab, poden inscribirse para participar nesta campaña de captación de catadores/as a través do enderezo de correo electrónico info@tastelab.es. Tamén se pode obter máis información ao respecto das funcións a desenvolver, así como respecto ao evento programado para este xoves 26 de setembro, a través do número de teléfono 982 818 019.
