Unha pegada para a historia. Polo menos, segundo o Consello Superior de Investigacións Científicas (CSIC). Un grupo de investigadores atopou presuntamente a pegada dactilar humana máis antiga do mundo, en colaboración coa policía científica. Algúns expertos, iso si, poñen en dúbida as conclusións da investigación.
O obxecto é un canto rodado de granito, depositado polos neandertais hai arredor de 43.000 anos. Neste, pintouse un punto vermello. A súa excepcionalidade, segundo o CSIC, radica en que no trazo pintado con ocre na superficie do canto identificouse unha pegada dactilar humana mediante técnicas multiespectrais e identificación forense. Este achado sería o exemplar máis completo e antigo dunha pegada dactilar humana no mundo. Ademais, a organización destaca o uso deliberado do pigmento con propósitos simbólicos.
Ante a publicación deste artigo académico, algúns expertos mostraron a súa desconformidade coa forma na que se interpretan estes datos. É o caso de Roberto Ontañón, director do Museo de Prehistoria e Arqueoloxía de Cantabria, ou de Clive Finlayson, experto en neandertais. “A esa sólida base empírica non lle corresponde una lectura dos datos igualmente rigorosa”, comentaba Ontañón nunhas declaracións nun artigo en El País.
Un rostro humano?
O estudo científico, a través dun microscopio electrónico de varrido e análises multiespectrais afirma que este obxecto foi manipulado intencionalmente para fins non utilitarios. O seu descubrimento pon o foco na capacidade simbólica dos neandertais, suxerindo que podían proxectar pensamentos abstractos sobre obxectos materiais. Ademais, os investigadores cren que o obxecto foi seleccionado pola súa morfoloxía natural: evoca un rostro humano, segundo afirman en The Conversation.
Varios científicos do IGME-CSIC participaron na campaña arqueolóxica na que se produciu o descubrimento e posterior caracterización da peza coa pegada. Alí, realizaron o contexto xeolóxico, petrolóxico e estratigráfico e as análises preliminares e as fluorescencias de raios X.
Un achado dun alto impacto mundial
A importancia patrimonial deste achado para Segovia, Castela e León, España e Europa sería excepcional, segundo os investigadores. A rexión situaríase así nun lugar destacado dentro do panorama europeo. Ademais, ofrecería un testemuño único sobre as capacidades cognitivas e culturais dos últimos neandertais da península ibérica.
E por isto que é importante verificar ben a utilidade deste achado. Para os investigadores, non só supón un fito na investigación prehistórica europea, senón tamén unha oportunidade para promover o patrimonio arqueolóxico de Castela e León.
