Predicir que pacientes responderán a un tratamento é decisivo na abordaxe do cancro. Co fin de mellorar a supervivencia e calidade de vida dos afectados por cancro de pulmón non microcítico metastásico, o equipo do grupo de Oncoloxía Médica Traslacional (Oncomet) do Instituto de Investigación Sanitaria de Santiago (IDIS) acaba de publicar un artigo na revista Molecular and cellular proteomics que investiga a identificación dunha firma proteómica que proporcione información para predicir a resposta á inmunoterapia nesta patoloxía.
Durante o estudo, os investigadores analizaron o valor preditivo que presentan as proteínas expresadas dun xeito diferencial en pacientes con este tipo de cancro en función da resposta que presentaron ao tratamento.
As análises destas proteínas realizáronse mediante unha metodoloxía coa que conta a plataforma de proteómica do IDIS, pertencente á USC, que permite a análise masiva de proteínas nun medio chamado plasma, denominada SWATH-MS. Dita metodoloxía permitiu identificar 324 proteínas expresadas de forma diferencial entre pacientes que responderon e os que non responderon á inmunoterapia.
Predicir a resposta á inmunoterapia
Actualmente, só existe un biomarcador empregado nos hospitais e clínicas para predicir a resposta da inmunoterapia neste tipo de pacientes. Con todo, esta técnica presenta unha baixa eficacia preditiva, xa que só arredor do 30% de pacientes con cancro de pulmón non microcítico mostra unha boa resposta á inmunoterapia” explica Ana Belén Dávila, unha das autoras principais do estudo e responsable da liña de traballo de nano-oncoloxía do grupo.
O equipo investigador desenvolveu un modelo composto por unha combinación de sete proteínas. Este conxunto de moléculas mostrou un valor máis alto para predicir a resposta a inmunoterapia que o biomarcador actual, na mostra de pacientes analizada. “As análises de supervivencia mostraron que niveis baixos de tres destas proteínas asócianse cunha supervivencia libre de progresión do cancro e cunha supervivencia global máis prolongada destes pacientes, mentres que os niveis baixos doutra destas proteínas asociábanse cunha peor supervivencia global”, sinala a investigadora.
