Unha masa de aire polar devolve o frío intenso a Galicia, despois dunha fin de semana de Entroido con temperaturas que superaron os 20 graos en boa parte do país. Polo tanto, volve o inverno e deixa a metade do territorio cuberto de neve, coa alerta amarela activada nas montañas de Lugo e Ourense e no interior da Coruña por acumulacións superiores aos dous centímetros a partir dos 600 metros. De feito, a cota de neve descendeu bruscamente nas últimas horas, situándose nalgúns puntos da montaña luguesa por debaixo dos 400 metros. De feito, as temperaturas máximas non superarán os 12 graos nas cidades galegas, con Pontevedra rexistrando o valor máis alto do día.
O escenario manterase este venres, con temperaturas baixas para esta época do ano e, por tanto, coa formación de xeadas. Ademais, conforme vaia avanzando o día, as precipitacións desprazaranse de norte a sur debido a unha borrasca situada no Cantábrico que afectará a Galicia. Segundo informa Meteogalicia, coa chegada da fin de semana as temperaturas experimentarán un “lixeiro ascenso” e recuperarase a estabilidade, posto que a borrasca do Cantábrico se desprazará cara ao norte de Portugal. Galicia recuperará a influencia anticiclónica o domingo, con temperaturas sen grandes cambios respecto aos días anteriores.
O frío intenso azoutará Galicia con máis forza durante a xornada deste xoves e xa son múltiples usuarios que deixan testemuño da neve en diferentes puntos de Galicia a través das redes sociais. Aquí unha mostra deles:
Forte nevarada en Guitiriz
Nas montañas de Lugo e Ourense, igual que no interior de Galicia, é onde se esperaba que caeran as nevaradas máis fortes, coma esta de Santa Cruz, en Guitiriz.
A neve tamén chegou a Soutelo de Montes
Outro lugar do interior de Galicia, esta vez en Soutelo de Montes (Forcarei), onde caeron folerpas de neve. Esta mañá tamén, pero non callou.
Folerpas de neve en Boimorto
O interior galego está a ser o mellor testemuño da neve. Incluídos os concellos do interior da Coruña, como Boimorto.
Sarabia na Coruña
A neve non foi a única que caer con forza esta noite. Na Coruña deixouse ver unha intensa xeada derivada da sarabia.
