Únete á nosa canle de Whatsapp
Galicia experimentará a mediados desta semana “un xiro importante” de tempo. Unha gran depresión atmosférica, que se descolgará sobre o oeste de Europa, provocará un drástico descenso das temperaturas a partir deste mércores. Pasaremos de valores que superaban os 24 graos durante esta fin de semana do Entroido, a unha baixada de ata 10 graos nas temperaturas. De feito, durante o mércores 22 producirase un descenso progresivo da cota de neve, que pasará dos 1.200 aos 600 metros en tan só unhas horas. Ademais, unha fronte fría que chegará este mércores polo litoral noroeste deixará precipitacións no litoral coruñés que se irán desprazando por toda Galicia ao longo da xornada.
En palabras recollidas pola Axencia Estatal de Meteoroloxía, este cambio de tempo obrigaranos a pasar dun ambiente primaveral a un “rigoroso inverno”. A inestabilidade xa se comezará a notar a comezos de semana debido á entrada de aire frío en capas altas da atmosfera. Durante as últimas horas da tarde deste luns, haberá chuvias que serán máis probables e intensas no sur e este de Galicia. Porén, as temperaturas aínda non experimentarán cambios. De feito, rexistraranse máximas de 24 graos en Pontevedra. A máis baixa de Galicia será a de Lugo, con 19 graos.
Galicia recuperará a influencia anticiclónica na última semana de febreiro
O escenario manterase estable ata o mércores, cunha temperatura máxima de 11 graos en Ouresnse e Vigo. A cota de neve situarase entre os 500 e 700 metros, cunha baixada considerable en relación a principios da semana. De feito, o xoves repetirase o mesmo escenario, con presenza de aire frío, tanto en superficie como en altura. As precipitacións, segundo informan dende Meteogalicia, serán máis frecuentes na metade norte. As temperaturas irán descendendo, debido a esa depresión atmosférica, con mínimas de 1 grao en Ourense, Lugo e Santiago.
Finalmente, a situación aínda é incerta de cara á última fin de semana de febreiro. Espérase que os mapas se continúen actualizando nos próximos días, pero o prognóstico apunta a menos inestabilidade pero maior sensación de frío. Segundo indican dende Meteogalicia, durante o venres e as primeiras horas do sábado manterase unha alta probabilidade de precipitación, situada entre o 75% e o 80%. Porén, e conforme vaia avanzando o día 25, Galicia recuperará a influencia anticiclónica. O domingo haberá de novo un tempo seco con temperaturas que serán baixas para a época do ano, con mínimas de 3 graos, dado os ventos de compoñente norte que predominarán durante toda a xornada.
