É unha das especies ameazadas no litoral galego, cun equilibrio moi fráxil que precisa protección. A píllara das dunas (Charadrius alexandrinus) é unha pequena ave limícola que tamén se atopa nunha situación vulnerable na zona norte de Portugal. Alí desenvolve un proxecto de conservación a Asociación Naturalista Baixo Miño (Anabam), entre as praias da Foz (Caminha) no esteiro do río Miño, e a praia do Forte do Paçô (en Carreço-Viana do Castelo). É o chamado Projeto Borrelho (nome que recibe en portugués a píllara).
Nestes lugares foron tomadas as imaxes que publica o grupo Ecoloxía Azul, que colabora tamén con este proxecto de Anabam, e que se recollen nun vídeo de máis de seis minutos que acaba de publicar o grupo. Nel pódese observar como se desenvolven nestes entornos varios exemplares de píllara das dunas.
Segundo os datos recollidos por Anabam ata o 20 de maio, no que vai de 2019 atopáronse 24 niños e naceron 9 polos de píllara das dunas. Catro deles xa están anelados para o seu seguimento.
A píllara das dunas no noroeste ibérico
A píllara das dunas, recoñecida como ave do ano 2019 por SEO-BirdLife, ten en Galicia e o norte de Portugal o seu último reduto no norte da península Ibérica, xa que desapareceu no resto de zonas do litoral septentrional, e só se ve xa na costa portuguesa e mediterránea da Península. Estímase que na actualidade quedan pouco máis dun cento de parellas ao longo do litoral galego.
Ante a magnitude do problema, a Xunta de Galicia aprobou en 2014 o plan de conservación da píllara, no que se marcan as liñas mestras para a súa protección. Sinaláronse medidas para levar a cabo en preto de medio cento de praias con posibilidades de albergar niños de píllara. Ademais, establécense limitacións nos accesos, na presenza de animais domésticos ceibos e nas actividades deportivas e de limpeza e no movemento de maquinaria, entre outras. Aínda así, seguen sendo frecuentes os incumprimentos desta norma.
