A píllara das dunas (Charadrius alexandrinus) é unha ave que se atopa nunha complicada situación en Galicia. O noso litoral é o único do norte de España onde aínda sobrevive esta especie, polo que o seguimento da súa poboación é esencial. Tal e como confirmaron membros da entidade naturalista Axena, nos últimos días apareceron varios niños desta especie nas praias de Baldaio (Carballo) e Aguieira (Porto do Son).
Biólogos e ecoloxistas solicitan máis medidas de protección
Nesta época comeza a posta dos ovos, que se leva a cabo normalmente en praias con dunas ou lagoas. Nos últimos lustros, a poboación da píllara viuse gravemente afectada, sobre todo, polo impacto do ser humano. Os bañistas, e as mascotas que corren ceibas pola area, coma os cans, poden esmagar os niños, coa conseguinte morte das crías. Por iso, biólogos e colectivos ecoloxistas alertan da necesidade de tomar medidas nos areais con maior presenza de niños, como son, ademais de Baldaio e Agueira, outras praias como Coroso ou Valdoviño. Entre elas están a sinalización e protección dos niños e a obriga de levar amarrados aos cans pola area.
Amais do factor humano, os niños teñen que se enfrontar a outras dificultades, como a presenza de predadores e a acción das mareas vivas. De feito, un dos niños aparecidos na Aguieira xa foi destruído pola subida da marea.
Segundo o Catálogo Galego de Especies Ameazadas, a píllara das dunas, tamén coñecida como píllara papuda, atópase nunha situación “vulnerable”.
A ver se entre todos conseguimos sacar adiante a unha das especies máis amenazadas de Galicia.