David Couce retrata dende hai anos os raios verdes que aparecen en Galicia, un dos fenómenos máis curiosos que nos deixa o Sol. Couce explica que hai tres anos lle viu a varios fotógrafos captar a Torre de Hércules e as Illas Sisargas de fondo. “Pensei en darlle unha volta e meter o Sol na ecuación”, alega. Explica que lle custou atopar un día que non estivese nublado cando o Sol caía nesa zona, que son entre dous e tres xornadas en outono e primavera. Nunha das fotos pódese ver tamén o Helimer de Salvamento.
O raio verde adoita producirse despois da saída do Sol ou pouco antes do solpor. Debido a unhas determinadas condicións, a atmosfera produce un fenómeno de dispersión e difracción das ondas de luz que anula algunhas cores do espectro visible para os humanos, mentres que maximiza as ondas arredor dos 525nm, que se corresponden cos tons verdosos. É moi difícil poder velo, moitos metros retratalo.
Hai outra variante moito menos habitual: o raio azul ou violeta. Para observalo, é preciso que se maximicen só as ondas de luz arredor dos 450nm. Ata hai pouco tempo había escasos documentos gráficos no mundo que amosasen a súa presenza. Nos últimos anos, foi observado e retratado en varias ocasións en Galicia. A primeira constancia é a de Alfredo Madrigal, que o observou en Loiba en 2016.
