Mércores 21 Febreiro 2024

Unha masa de aire subtropical elevará os termómetros ata os 33 graos en Galicia

Tralo 'Verán de San Miguel' as temperaturas volven subir en toda a comunidade. As provincias con máis calor serán Ourense e Pontevedra

Acabou o ‘Verán de San Miguel’ e os mercurios volven subir en Galicia. Esta fin de semana agárdanse temperaturas moi altas en todas as comunidades autonómas. Aínda que a influencia do outono empeza a notarse pola duración dos días e as temperaturas nocturnas, os trinte graos que marcarán os termómetros os próximos días farannos crer que o verán aínda non rematou. Para os meteorólogos estase alongando de máis, e, neste caso, será unha masa de aire cálida subtropical a que manterá os valores entre os 30 e 33 graos. As temperaturas máis altas daranse en Ourense e Pontevedra.

Dende a xornada do xoves agárdase un tempo seco e cálido con intervalos de nubes altas e brétemas costeiras nas primeiras horas. “Nótase que o Sol tarda máis en levantar as néboas. É un matiz do outono”, explican dende MeteoGalicia. O vento soprará moi frouxo de compoñente sur. E é que, debido á posición do anticiclón, as borrascas non poden entrar en Galicia, nin o aire frío que sería “habitual” que entrase. “A posición do anticiclón está máis ao sur”, explican dende MeteoGalicia. O mes de outubro comezou batendo récords de temperatura en 43 municipios galegos. De momento, que non está previsto que se volvan superar estes valores anómalos.

Publicidade

O domingo será o día máis coloroso. A xornada estará caracterizada polos ceos despexaos, o aire cálido e pouco vento, con entradas de brétemas costeiras no litoral norte. Ourense poderá chegar aos 33 graos; Pontevedra a 32; Lugo a 31; e A Coruña a 29. Despois de que o pasado setembro se convertese no máis cálido a nivel mundial -non foi o máis quente da serie histórica galega- segundo datos do Servizo de Cambio Climático de Copernicus, todo apunta a que, como mínimo, outubro presentará anomalías térmicas. Como consecuencia, despois de acadar marcas históricas de temperatura, 2023 “perfílase xa como o ano máis cálido que xamais se deu no planeta”, alegan dende o organismo europeo.

Posible borrasca a vindeira semana

A mediados da vindeira semana agárdanse cambios no tempo. Unha borrasca ameaza con repartir precipitacións durante a ponte do Pilar, pero non está claro. “Antes parecía que ían haber moitas chuvias, pero agora xa parece que non vai haber ningunha no festivo”, explican dende MeteoGalicia. As borrascas atópanse moi cerca do noroeste da península e queda por saber se rematarán chegando á comunidade, e tamén, con que intensidade. De momento, dependendo do modelo, as chuvias poden ser protagonistas ou, directamente, ninguén se lembrará delas. Como mínimo, a estabilidade atmosférica durará ata o próximo martes, que será o día no que as frontes ameacen con inaugurar o tempo outonal. “Nalgún momento ten que cambiar”, comentan dende o organismo de meteoroloxía galego.

DEIXAR UNHA RESPOSTA

Please enter your comment!
Please enter your name here

Este sitio emprega Akismet para reducir o spam. Aprende como se procesan os datos dos teus comentarios.

Relacionadas

A borrasca Irene azouta Galicia con refachos de máis de 80 km/h

É unha fronte de alto impacto e A Coruña e Ourense poderán acumular 40 litros en 12 horas

Un ano de eventos climáticos extremos… pero non en Galicia: “Os valores non foron excepcionais”

O físico da USC Gonzalo Míguez Macho sostén que a temperatura promedio será máis alta este ano, pero non de maneira excesiva como noutros puntos de España

Un río atmosférico e un chorro polar impactarán en Galicia na ponte de decembro

A entrada de varias borrascas e vaguadas descargarán precipitacións ao longo de toda a semana. O único día de tempo estable será o martes

Un lategazo polar baixa drasticamente as temperaturas en Galicia

Os ventos de compoñente norte aumentarán a sensación térmica. As máximas en Lugo non superarán os 12 graos e os 13 na Coruña e Ourense