Venres 23 Febreiro 2024

Récord histórico de calor en 43 municipios galegos

O 25% de todas as estacións meteorolóxicas de Galicia superaron os rexistros anteriores de temperaturas máximas

Outubro comeza con récord histórico de calor en toda España. En Galicia superáronse as marcas nun total de 43 municipios galegos, os cales conforman o 25% de todas as estacións meteorolóxicas da comunidade. Dende MeteoGalicia apuntan que, sen dúbida, non lembran un episodio similar. Nunca aconteceu algo parecido como mínimo nos últimos 20 anos no que levan operativas estas estacións meteorolóxicas. O 1 de outubro foi o día máis caloroso desta fin de semana de plena estabilidade atmosférica, e, por ende, a xornada na que se superaron as temperaturas máximas. Aínda que se agarda moito sol nos próximos días, non se prevén novos récords de calor para outubro. De momento, e climatoloxicamente falando, esta situación vale para afirmar que en Galicia o verán está sendo máis longo do normal.

A masa de aire cálido que afectou a Galicia esta pasada fin de semana deixou os termómetros por riba dos trinta graos nunha boa parte de Galicia. As provincias que máis traspasaron as marcas foron Lugo e Ourense. Na estación lucense da Pontenova rexistráronse 32,01 graos; na de Bóveda chegouse aos 33,45, aumentando unhas décimas con respecto ao máximo anterior; en Portomarín, San Fiz (Chantada), o máximo superouse en máis dun grao; e en Sober (Xabrega), máis de dous, chegando os ata 34,41 graos. Segundo datos de MeteoGalicia, en Ourense acadan tamén récord de temperatura Abradelo (Samos), o Campus de Lugo, Castro de Rei e Castro R. de Lea, Conchada, Cospeito, Courel, Feiranova-Santaballa (Vilalba), Monforte, Morelle (Sarria), O Xipro (Fonsagrada), Olveda (Antas de Ulla), Pol, Portomarín, Riotorto, Sambreixo e San Clodio.

Na cidade de Ourense chegouse a 35 graos e estacións como a da Portela rexistraron 34,99, nas Petarelas (Rubiá) 34,06 e 34,57 en Prado (Castrelo de Miño). Baten tamén récord de temperatura Amiudal (Avión), Gandarela (Celanova), Larouco, Lobios, Monte Medo en Baños de Molgas, Pazo de Fontefiz (Coles), Ponte Boga (Castro Caldelas). 

Lugo é a provincia que máis récords de temperatura suma

Na Coruña seis concellos marcaron máximas nunca rexistradas anteriormente. Foron as estacións da Capela (32,85), Arzúa (32), Boimorto (33,38), Melide (33,28), Montaos en Ordes (31,9), Olas en Mesía (31,49) e Ordes (31,56). E tamén, outras sete estacións de Pontevedra recolleron unhas cifras moi altas o 1 de outubro: Atios, no Porriño (31,69); Camanzo, en Vila de Cruces (31,69); Gargamala, en Mondariz (31,21); Lalín (31,12); Mouriscade, en Lalín (31,23); Meder, en Salvaterra de Miño (32,9) e Pazos de Borbé (30,61). 

Un setembro moi cálido

A poucos días de facerse público o informe climatolóxico mensual de MeteoGalicia de setembro, o organismo adianta a GCiencia que foi un mes “moi cálido”, cunha anomalía da temperatura máxima de 1,3 graos por riba da media. Non é a máis alta, xa que en 2018 se bateron todos os récords cunha anomalía de temperatura de 2,7 graos. “Entre hoxe e onte a situación cambiou drasticamente”, explican dende MeteoGalicia. Mentres que o 1 de outubro se rexistraban cifras históricas en canto a temperatura, o día 2 está marcado pola probabilidade de precipitacións no terzo norte de Galicia, unha situación que pode estenderse ata o martes. Con todo, a estabilidade atmosférica continuará pola senda da pasada fin de semana e a partir do mércores os ceos volverán a estar despexados. 

Como mínimo, os primeiros dez días de outubro semellarán a días de verán. Non se agardan máis precipitacións. “Será un comezo seco e cálido”, apunta MeteoGalicia sobre outubro. É moi cedo aínda para supor que este mes tamén se considerará “moi cálido” xa que o tempo está moi cambiante, pero a anomalía do pasado setembro (que é 0,7 graos máis alta que a de 2022) dá que pensar. “En canto aos días de calor, si que podemos falar dun verán máis longo”, explican dende MeteoGalicia. O organismo apunta que foi froito da “casualidade” que estas temperaturas se desen en outubro, xa que podería ter acontecido o último día de setembro. Ademais, polo momento, non se esperan novas marcas nos termómetros. 

DEIXAR UNHA RESPOSTA

Please enter your comment!
Please enter your name here

Este sitio emprega Akismet para reducir o spam. Aprende como se procesan os datos dos teus comentarios.

Relacionadas

00:00:12

Karlotta azouta Galicia con refachos de máis de 200 km/h

A borrasca mantén á comunidade en alerta laranxa por vento e chuvia este xoves e provoca varias incidencias

Os ventos do suroeste arrastran unha nova masa de po africano a Galicia

A chegada dunha fronte asociada á borrasca Karlotta limpará o aire e evitará que o episodio se prolongue máis dun día

Un río atmosférico cargado de humidade regará Galicia na segunda metade da semana

Unha borrasca situada en Irlanda deixará acumulados de ata 100 l/m2 no sur da provincia da Coruña e en Pontevedra

Unha masa de po africano chega a Galicia: estas son as consecuencias

A calixe provoca un empeoramento da calidade do aire en todo país. Os efectos das partículas en suspensións prolongaranse ata mediados de semana