Este ano os lumes están arrasando Canadá este agosto. Aínda que esta tempada de incendios forestais semella ser máis moderada respecto a anos anteriores, o país chegou a afrontar ata 900 lumes activos simultaneamente este mes, maioritariamente no oeste do país. As consecuencias deste gran número de incendios non se mantén nos límites canadenses, senón que chegan a Galicia en forma de fume. Así, este luns, que ía ter ceos despexados, deixou paso a unha lixeira bruma que ocultaba o sol.
A Axencia Estatal de Meteoroloxía (AEMET) confirmaba a través do seu perfil na aplicación X as sospeitas: “Durante todo o día de hoxe os ceos víronse esbrancuxados, pero non eran nubes altas nin po en suspensión procedente do Sáhara”, advertiu o organismo. “É fume procedente de incendios en Canadá”, informou a través da rede social, pois estes gases foron empuxados cara a Europa a través do Atlántico.
Por outro lado, o usuario David Domínguez, @RedmeteoP, anunciaba que “non é a primeira nin a última vez” que ocorre un suceso coma este, lembrando deste xeito o ocorrido en xuño do ano pasado, cando os incendios forestais de Canadá conseguiron a súa cifra récord, queimando 17 millóns de hectáreas. Con todo, non é un fénomeno que precise unha alerta, e irase retirando pouco a pouco nos próximos días, ou horas.
