Como proxectar nun gráfico de comprensión sinxela os datos que explican o noso entorno? A plataforma The Pudding, composta por xornalistas e enxeñeiros especializados no manexo de grandes bases de datos, desenvolve ferramentas para interpretar a información neste senso. Unha delas é Human Terrain, no que se pode comprobar en tres dimensións a evolución da poboación mundial nos últimos 40 anos. O traballo mestura as imaxes tomadas por satélite, os datos do censo arredor de todo o planeta e os sistemas de información xeográfica para crear mapas da densidade de poboación.
Así, cada columna representada no mapa abrangue entre 250 e 5.000 metros cadrados. E canto máis alta é, significa que máis xente vive nese espazo. A ferramenta permite ver a situación actual (datos de 2015), facer comparacións co ano 1990 e, en moitos casos, co 1975, e amosar tamén a variación, tanto en aumento como en decrecemento, entre o ano 1990 e o 2015. O mapa de Galicia vese así (á esquerda, 1975; e á dereita, 2015):
No mapa evidénciase como, mentres as áreas de Vigo, A Coruña e Santiago e, en menor medida, Lugo e Ourense, mantéñense nunha situación semellante, o interior de Galicia perdeu poboación en moitas cabeceiras de comarca.
A ferramenta de The Pudding permite observar tamén o espectacular crecemento demográfico en países como India ou China.
Podes consultar todo o proxecto nesta ligazón. Para obter máis detalles sobre os datos de Galicia, está o IGE. E tamén podes ler:
Oito gráficos sobre o avellentamento e o despoboamento en Galicia
