A calidade da astrofotografía feita en Galicia é indiscutible. Nos últimos anos, moitos autores teñen recibido importantes recoñecementos internacionais polas imaxes do ceo tomadas tanto aquí como noutros lugares do planeta. Daniel Llamas e Daniel Lois, impulsores do colectivo Enfoque Nocturno, son dous deles. E ambos acaban de lanzar o libro Galicia; Un lugar mágico para contemplar las estrellas.
Conta Daniel Llamas que a editorial Ludica 7, que publica o libro, contactou con eles despois dos recoñecementos recibidos nos últimos dous anos, como os ND Awards, The World At Night ou o MEDCLIC Oceans Photo Contest. “Creo que o libro reflicte a paixón que sentimos pola fotografía e pola nosa terra”, di Llamas.
O traballo consta de 100 imaxes tomadas nos últimos seis anos polos dous fotógrafos. Están impresas nun papel de gran calidade (páxinas de 150 g.), tapa dura de 21,5 x 26 cm. e 228 páxinas. Nel amósase a calidade das zonas de Galicia que aínda están libres de contaminación luminosa, e destácanse tamén os destinos Starlight como A Veiga ou as Illas Atlánticas e outros faros, montes, ermidas e bosques do país.
A obra recolle tamén varios prólogos, de xornalistas como Manolo Rodríguez e do astrónomo José Ángel Docobo, director do Observatorio Ramón María Aller da USC. Tamén recolle unha entrevista cos autores nos que explican como desenvolven o seu traballo.
O libro xa se pode reservar a través da editorial, no enderezo info@ludica7.com, e chegará as librarías de varias cidades galegas a comezos de decembro.
