As ferramentas de visualización do planeta que ofrece Google marcaron un antes e un despois na posibilidade de ver desde unha pantalla numerosos lugares do planeta. Sexa a través de ferramentas como Earth, Maps ou Street View, calquera persoa con acceso a Internet pode viaxar e descubrir paisaxes fascinantes. Con toda a bagaxe de información percorrida, o xigante da internet acaba de difundir unha ferramenta interactiva na que comparte unha selección de 1.000 das paisaxes máis impresionantes do planeta observadas desde o espazo mediante Earth View. E entre elas aparece unha fotografía das bateas da ría de Arousa cun barco cruzando a través delas.
Esta ferramenta recolle milleiros de paisaxes fascinantes arredor do planeta, vistas desde o espazo. A colección leva anos dispoñible na rede para os usuarios, podendo ser usada como fondo de pantalla para os diferentes dispositivos dependentes de Google.
A última actualización, que inclúe a imaxe de Arousa, mellora a resolución, que acada o 4K, e pon a disposición de calquera persoa todas estas fotografías. A imaxe está tomada, segundo as coordenadas facilitadas por Google, nun dos polígonos de bateas situados entre A Illa e Vilanova, ao norte da ponte.
Filter more than 2,500 Earth Views by color or region
