As asociacións Limpiarousa e Noia Limpa denuncian a falta de compromiso das administracións fronte á acumulación de lixo na costa de Vilagarcía de Arousa. O suceso máis recente vén protagonizado por un poste de cinco metros de lonxitude, aparentemente empregado para suxeitar os pantaláns nos portos, que apareceu na praia de Carril (Vilagarcía de Arousa) o pasado 4 de maio. A súa composición preocupa “polos materiais contaminantes que o forman: poliéster e resinas na parte exterior, e algún tipo de corcho na parte interior (poliestierno, poliuterano ou similar)”.
Segundo denuncian dende as asociacións, esta localización énchese de lixo procedente da fábrica de conservas abandonada colindante. Con todo, este escombro está no mesmo sitio despois de máis dun mes de chamadas ás administracións, que se declaran sen competencia na súa retirada. Así, estas iniciativas demandan a necesidade dunha rede de coidado do patrimonio natural, cun protocolo establecido para este tipo de casos. “Non fai falta un cargueiro de fuel ou un contedor de pellets para darse conta de que algo está fallando no coidado das nosas costas”, conclúe unha das integrantes de Limpiarousa.
