A bordo do catamarán da ONG Edmaktub, o persoal científico do Instituto Español de Oceanografía (IEO, CSIC) de Vigo vén de realizar un estudo multidisciplinar dos rorcuales (Balaenoptera physalus) que se concentran nas augas galegas para alimentarse.
A campaña, localizada na plataforma continental fronte ás Rías Baixas, permitiu tomar mostras de auga para a caracterización xenética dos rorcuales a través do ADN ambiental. O comportamento dos rorcuales en augas galegas apréciase no vídeo gravado por Toño Vázquez a bordo do catamarán, e onde se aprecia o achegamento e actividade destes cetáceos. Aínda que normalmente viven nas augas oceánicas, non resulta estraño atopalos preto da plataforma continental.
Emprego de drons para recoller máis información
Ademais, os investigadores recolleron mostras de microbioma do tracto respiratorio mediante o emprego de drons e tomáronse imaxes para a súa identificación e análise biométrico:“A análise do ADN ambiental presente na auga e o uso de drons para a toma de datos e mostras fai posible obter unha información ata o de agora descoñecida, o que nos permitirá caracterizar a poboación que visita as augas galegas, estudar a súa conectividade e patróns de migración, así como o seu estado de saúde”, sinala Camilo Saavedra, investigador do IEO en Vigo e responsable da campaña.
A campaña RorquGAL realizouse no marco do proxecto Emphatic (E-DNA, Microbiomes, Photogrammetry and Hormones – Assessment Techniques In Cetaceans), coordinado polo Instituto de Investigacións Mariñas (IIM-CSIC) e financiado a través da Fundación Biodiversidade do MITECO.
