A borrasca Babet é a primeira fronte intensa do outono. Descargará abundantes precipitacións nos vindeiros días no marco dun tren de borrascas que obrigará a Galicia a utilizar o paraugas durante máis de dez días. Este centro de baixas presións forma unha espiral no Atlántico polo cambio de masas de aire que xira en sentido contrario ao das agullas do reloxo. O día de maior protagonismo de Babet será o mércores e será o prólogo doutra borrasca que entrará o xoves.
Varias zonas de Galicia atópanse en alerta amarela por temporal marítimo na Costa da Morte e nas Rías Baixas. Está activo tamén o aviso amarelo en toda Galicia por refachos de vento que poderán acadar os 80 km/h e por chuvias que poden acumular máis de 40 l/m2 en tan só 12 horas na provincia de Pontevedra e no oeste e suroeste da Coruña.
Dende MeteoGalicia apuntan que é un “temporal típico de outono”. Xa de cara a fin de semana as precipitacións serán menos intensas pero caen as temperaturas polo predominio dos ventos do norte. Esta situación atmosférica podería provocar, de cara o próximo luns, as primeiras nevadas do outono.
