No conxunto do ano, as precipitacións acumuladas no Llevant da illa de Mallorca, onde se sitúa a localidade de Sant Llorenç, adoitan estar entre os 700 e os 800 litros por metro cadrado. Onte, en só 12 horas, a estación da Axencia Estatal de Meteoroloxía en Artà, vila próxima a Sant Llorenç, acumulou 232 l/m2. Como consecuencia destas chuvias torrenciais, lévanse xa contabilizadas 10 vítmas mortais e varias persoas desaparecidas.
O radar da Aemet, tal e como se pode ver na animación, rexistrou cantidades extraordinarias de chuvia no acumulado de seis horas, que afectaron sobre todo ao leste da illa de Mallorca e ao norte de Menorca.
A inestabilidade das tormentas provocou que, aínda que estaba activado o aviso amarelo, a Aemet elevase o nivel a laranxa e vermello na noite do martes.
Un torrente “moi peligroso”
A catástrofe de Sant Llorenç debeuse ao desbordamento do torrente de Ses Planes, que atravesa a localidade. En Mallorca é habitual ver canalizacións de cursos de auga que van prácticamente secos gran parte do ano, pero que incrementan moito o seu volume cando se producen chuvias torrenciais.
Segundo recolle Diario de Mallorca, que entrevista ao profesor de Xeografía Física Miquel Grimalt, da universidade das Illes Balears, o torrente “é moi peligroso, porque é moi deficiente arrastrando a auga” e, ademais, o núcleo está rodeado de montañas, “o que provoca unha punta moi grande de precipitación.
Grimalt subliñou tamén que o crecemento urbanístico puido influír no desastre. “Seguro que a xente maior do pobo, cando vía que chovía así, sabía que viría unha ‘torrentada’. Con 200 ou 300 litros por hora dirían: ‘aquí vai pasar algo’. E esa memoria, esa educación, perdémola”. O profesor Grimalt destaca tamén que a medida que o núcleo urbano medrou, as construcións achegáronse aos dous torrentes que discorren pola zona.
As intensas chuvias provocaron tamén destrozos nas vías de comunicación da illa, tal e como recolle IB3, que amosa neste vídeo unha fenda de varios metros na estrada que une Artà e Colònia de Sant Pere.
#InundacionsIB3 Així està la carretera d’Artà a la Colònia de Sant Pere ara mateix. L’aigua l’ha xapada per la meitat i ha obert un forat de 20 metres. En total, hi ha 13 trams de carreteres tallats per inundacions https://t.co/1fJyNvCwqb pic.twitter.com/wlLAXPF8Wi
— IB3 Notícies (@IB3noticies) 10 de octubre de 2018
