“Pensei que estaba orbitando arredor de Marte cando vin esta paisaxe”, escribiu a comezos deste mes o astronauta francés Thomas Pesquet, que actualmente forma parte da tripulación da Estación Espacial Internacional. Sen nubes á vista, e con cores avermelladas e ocres que se estenden ata onde se perde a vista, Pesquet lanzou a pregunta a través dunha fotografía en Flickr, tomada desde os 400 km de altura sobre a superficie da Terra, órbita na que se move o vehículo espacial a uns 28.000 km/h.
No seu comentario, Pesquet aproveitaba para reflexionar sobre a exploración marciana, moi de actualidade polas misións das axencias espaciais da China e os Estados Unidos. “Os científicos cren que Marte foi algunha vez un planeta moi distinto, e o seu ambiente mudou durante miles de millóns de anos”, polo que é posible “aprender máis sobre a súa historia pode axudarnos a protexer o futuro do noso fascinante planeta” escribía Pesquet.
O que non revelaba o astronauta, pero si recollía o portal Science Alert, é o lugar de aparencia marciana que retratou Pesquet desde o espazo. Son as montañas Tibesti, no territorio de Níxer e Chad, e forman parte do Sahara. Outra das imaxes tomadas desde a Estación Espacial dá máis pistas, xa que se pode ver a capa azulada da atmosfera:
Esta cordilleira ten orixe volcánica, aínda que hoxe os volcáns non están activos. Son as máis altas do Sahara, chegando ata os 3.415 metros no Emi Koussi. E así se ve por satélite.
