A contaminación masiva dos océanos é un dos problemas cos que teñen que lidar diariamente os ecosistemas mariños. Os seus habitantes, e entre eles os peixes, sofren a presenza deste material cando comen, xa que inxiren unha alta cantidade, e tamén cando nadan, quedando atrapados nalgúns obxectos. É o caso desta pequena criatura que ten enganchado no medio do seu corpo unha arandela de plástico. Pode moverse mais con limitiacións, está metido nese círculo e quen sabe se poderá desfacerse nalgún momento del. O vídeo foi tomado por Kais Mohamed Falcon, investigador do Instituto Oceanográfico de Vigo (IEO), que capturou nas augas da Ramallosa (Nigrán) as consecuencias do lixo nos mares.
A saúde dos océanos é crucial para o desenvolvemento natural dos ecosistemas e reséntese cada vez máis pola contaminación e o cambio climático. Os biólogos encargados do estudo destes animais están a atopar plásticos, materiais de pesca e todo tipo de obxectos nos estómagos, bocas, ou outras partes do corpo dos peixes, tanto dos máis pequenos, como pode ser este atopado en Nigrán, como en grandes tiburóns que realizan migracións transoceánicas. É un grave problema e por iso a ONU alertou de que en 2050 haberá máis plásticos que peixes nos océanos. Non hai que ir moi lonxe para ver a sucidade do mar, basta con achegarse a calquera praia cando baixa a marea.
