Galicia só ten 25 casos activos máis de coronavirus que o martes

Aínda que se detectaron 207 novos casos, concedéronse 112 altas que contribúen a frear o número de persoas que están a ser atendidas pola doenza

A Dirección Xeral de Saúde Pública da Consellería de Sanidade achegou na tarde deste mércores os últimos datos sobre a situación da epidemia do coronavirus SARS-CoV-2 en Galicia. Cos datos pechados na noite do martes, o número de casos activos de coronavirus en Galicia ascende a 5.460. Son só 25 máis có día anterior, ao constatarse 207 novos positivos confirmados fronte a 112 altas e os 20 falecementos rexistrados nas últimas horas.

Destes casos activos, 1.138 son da área da Coruña-Cee, 566 da de Lugo-A Mariña-Monforte, 1.001 da de Ourense-Verín-O Barco, 460 da de Pontevedra-O Salnés, 1.066 da área de Vigo, 911 da de Santiago-Barbanza e 318 da de Ferrol. Vigo, con 28 positivos menos respecto ao martes, representa a maior baixada de casos activos Tamén caeron en Pontevedra ( de 466 a 460). E Ourense, despois de varios días dun aumento notable de casos, frea tamén a súa tendencia. Así evolucionou a situación en cada área nas últimas dúas semanas:

Do total de pacientes positivos, 158 permanecen en UCI (4 menos que respecto ao día anterior, e un 2,89% dos casos activos), 835 están en unidades de hospitalización (75 menos e un 15,29%) e 4.467 no domicilio, dos que 781 son usuarios de residencias de maiores (104 máis e un 81,81%). Polo de agora, en Galicia rexistráronse 800 altas de pacientes e 278 falecementos. A cifra de mortes difundida por Sanidade volve incluír as persoas falecidas en residencias de maiores que deron positivo nas probas de coronavirus, e que durante varios días ofrecía por separado a Consellería de Política Social, tal e como explica Praza.

Das 20 persoas falecidas nas últimas 24 horas das que se ten rexistro, 12 morreron en hospitais e 8, en centros residenciais: 5 foron na residencia DomusVi San Lázaro (Santiago), 1 na residencia de Bande, en Ourense, 2 na residencia Nuestra Señora de la Esperanza (Ourense) e 2 na residencia DomusVi Cangas. Desde o comezo da crise, segundo os datos achegados este mércores pola Xunta, faleceron 108 persoas en centros residenciais: 57 deles nas propias residencias e 51 nos hospitais e as residencias integradas habilitadas pola Xunta para atender aos positivos de coronavirus.

O número de PCR realizadas ata o momento de 34.423, 2.277 máis có día anterior. Este gráfico representa a relación entre os casos novos confirmados cada día polo Ministerio de Sanidad e as probas novas respecto aos datos do día anterior.

A diminución das cifras de hospitalización (desde o luns hai 114 persoas menos ingresadas por coronavirus, algunhas porque faleceron, pero a maior parte porque recibiron a alta hospitalaria), apuntan cara a un freo da epidemia en Galicia. Aínda que se seguen rexistrando novos casos, sobre todo en centros de maiores e persoas con discapacidade, o número de altas diarias achégase cada vez máis ao de novos casos. Nas liñas da gráfica que se poden ver baixo estas liñas, e que están en escala logarítmica (é dicir, hai a mesma distancia de 1 a 10 que de 10 a 100 e de 100 a 1000, e así sucesivamente),  pode observarse a evolución da epidemia, que medrou sobre todo nas primeiras fases multiplicándose cada pouco tempo, pero que se vai freando nos últimos días.

Residencias e centros de maiores e discapacidade

Aínda que os falecementos en residencias se computan desde esta semana no conxunto dos datos achegados por Sanidade, o Sergas difunde por outra canle os positivos en cada un dos centros. Os maiores focos mantéñense nas residencias Nuestra Señora de la Esperanza de Ourense (103 usuarios e 34 traballadores afectados), e os centros da rede DomusVi en San Lázaro (82 e 37), Vigo (66 e e 11) e Cangas (98 e 17).

Este mércores, confirmáronse novas residencias afectadas na Laracha, Ribadeo, Monterrei ou Chandrexa de Queixa.

Esta é a situación en España:

Volve subir a cifra de mortos: 757 en 24 horas por coronavirus

En Portugal:

E no resto do mundo, onde os Estados Unidos superan os 400.000 casos acumulados:

DEIXAR UNHA RESPOSTA

Please enter your comment!
POLÍTICA DE COMENTARIOS:

GCiencia non publicará comentarios ofensivos, que non sexan respectuosos ou que conteñan expresións discriminatorias, difamatorias ou contrarias á lexislación vixente.

GCiencia no publicará comentarios ofensivos, que no sean respetuosos o que contentan expresiones discriminatorias, difamatorias o contrarias a la ley existente.

Please enter your name here

Este sitio emprega Akismet para reducir o spam. Aprende como se procesan os datos dos teus comentarios.