Sábado 20 Abril 2024

Turismo nos observatorios: outro xeito de ver as Canarias

As Illas Canarias non teñen porque ser só un destino de sol e praia, con boas temperaturas durante todo o ano. Nos cumes do arquipélago hai algo que as fai aínda máis atractivas, e case únicas no planeta: uns ceos limpos e unha atmosfera moi estable que acollen, nas illas de La Palma e Tenerife, dúas das maiores instalacións telescópicas do mundo. Os observatorios do Teide e o Roque de los Muchachos manteñen un programa de visitas guiadas que son unha das referencias estatais do turismo científico.

Os observatorios de Canarias

No Roque de los Muchachos, a case 2.400 metros de altitude na illa de La Palma, está o observatorio que acolle a xoia das grandes lentes que observan o ceo: o Gran Telescopio Canarias (GTC), de máis de 10 metros de diámetro, e un dos máis destacados do planeta. Xunto a el, unha rede de telescopios solares, nocturnos e outros adaptados tamén ao estudo das Altas Enerxías conforman unha paisaxe que recibe todos os anos a decenas de investigadores, pero tamén turistas interesados na astrofísica.

Publicidade

E na illa de Tenerife, a 2.300 metros, no macizo que leva ao cumio do Teide, aparece o observatorio de Izaña, onde está a maior colección internacional de telescopios do mundo; son 60, de máis de 20 países de todos os continentes.

Ambos observatorios constitúen, deste xeito, o Observatorio Norte Europeo, o lugar escollido por decenas de países do continente para ubicar as súas fiestras cara ao espazo. Son, por tanto, un epicentro de investigación, innovación e desenvolvemento das tecnoloxías de vangarda na exploración do universo.

Un ceo protexido por lei

Desde hai 30 anos, a limpeza do ceo de Canarias está protexida por norma. A Lei do Ceo, aprobada en 1988, regula diversos aspectos co obxectivo de que os telescopios instalados no arquipélago dispoñan das mellores condicións posibles para a observación. Así, contrólanse as iluminacións exteriores, os niveis de contaminación radioeléctrica, a contaminación atmosférica e o tráfico aéreo, para evitar calquera posible interferencia sobre o Roque de los Muchachos e Izaña. Por este mesmo motivo, as visitas turísticas aos observatorios só están permitidas en horario diurno.

As condicións meteorolóxicas fan o resto: un réxime de ventos e correntes dominadas polo anticiclón das Azores e os ventos alisios estabilizan a atmosfera durante o 90% dos días e noites do ano nas altitudes por riba dos 2.000 metros. E ademais, por este mesmo motivo, a luz artificial queda atrapada no mar de nubes que adoita verse desde os dous observatorios; así, a iluminación das vilas e estradas non se proxecta cara ao ceo.

As visitas

Observatorio do Teide:

Pódese chegar ata Izaña pola estrada que cruza a illa a través do macizo do Teide. O traxecto dura aproximadamente unha hora desde calquera punto, sempre que as condicións meteorolóxicas acompañen (o IAC informa puntualmente da situación das estradas de acceso). A través de Volcano Teide Experience, poden reservarse as visitas, con varios horarios e unha duración aproximada de 90 minutos. Nela ofrécese unha completa visión das instalacións e o seu funcionamento, e é tamén posible visitar o interior dalgún dos telescopios. O prezo é de 21 euros (sen transporte).

Para os centros educativos de toda España, a visita é gratuíta. Porén, debido ás condicións meteorolóxicas, están suspendidas de decembro a marzo. No caso dos residentes en Canarias, hai un desconto na tarifa do 40%, mentres que para os menores residentes de 16 anos é gratuíta.

Observatorio do Roque de los Muchachos:

No caso dos telescopios da illa de La Palma, as visitas xestiónanse a través da Fundación Starlight, que conta con guías habilitados e especializados en turismo astronómico para realizar as expedicións. Debido ás condicións de traballo no observatorio e a razóns operativas e de acceso ao lugar, as visitas só se poden realizar en determinados días e horas, e en grupos reducidos, polo que hai que reservar con antelación nas páxinas indicadas ao efecto. Cada guía dispón de determinadas tarifas e condicións, que se poden consultar nesta ligazón.

No caso dos centros educativos, tamén é posible visitar o Roque de los Muchachos. Cómpre cubrir un formulario, previa lectura das condicións de acceso.

Museo da Ciencia e o Cosmos

Alén dos dous observatorios, a illa de Tenerife ofrece tamén outra opción para os amantes da astronomía. A carón da sede do Instituto de Astrofísica de Canarias, na cidade de La Laguna, está o Museo da Ciencia e o Cosmos. Ofrece diversas exposicións permanentes e temporais sobre a historia do universo e os astros do Sistema Solar.

A información sobre visitas, horarios e prezos pode consultarse nesta ligazón.

.

 

DEIXAR UNHA RESPOSTA

Please enter your comment!
Please enter your name here

Este sitio emprega Akismet para reducir o spam. Aprende como se procesan os datos dos teus comentarios.

Relacionadas

LIA (2), pioneiros galegos no desenvolvemento da intelixencia artificial na astronomía

O grupo da UDC recibiu o Premio Spin-Off PuntoGal na edición 2023 pola súa traxectoria de éxito

Un novo exoplaneta desafía as teorías clásicas de formación planetaria

Un equipo de astronónomos descobre LHS 3154b, cunha masa similar a Neptuno, orbitando preto dunha estrela anana de moi baixa masa

Descubertos seis exoplanetas que ‘bailan’ de forma sincronizada arredor da súa estrela

Os planetas posúen unha configuración que apenas cambiou desde hai máis de mil millóns de anos

Begoña Vila: “Atoparemos probabilidades de vida noutro planeta”

Co gallo do décimo aniversario de Gciencia, a astrofísica da NASA analiza a divulgación dos achados cósmicos e a busca de vida intelixente