Desde fai séculos, as sociedades que medraron á beira do Atlántico en Galicia tiveron que adaptarse aos elementos e á xeografía para acadar o seu desenvolvemento. Un dos máis destacados vestixios da súa actividade é o patrimonio arquitectónico industrial que aínda hoxe se pode ver ao longo da costa. Da man do Museo Virtual da Fundación María José Jove, e co apoio da Deputación da Coruña, preséntase o proxecto “Arquitectura ao límite. Construción industrial no bordo litoral”, no que se documenta e debate en torno ao patrimonio arquitectónico situado nos case 1000 quilómetros de litoral que corresponden á provincia da Coruña.
O proxecto percorre mediante fotografías aéreas, con cadansúa análise e a realización dalgunhas composicións en tres dimensións, as paisaxes industriais do litoral. Inclúe un inventario de bens, co obxectivo de resaltar esta selección de inmobles é facer fincapé na súa singularidade; no seu valor histórico e arquitectónico e na importancia da súa conservación e difusión, contribuindo a evitar o seu deterioro ou desaparición.
A perspectiva das fotografías, tomadas desde un vehículo aéreo non tripulado, reforza, cunha estética moi coidada, a idea principal do proxecto: afondar na análise das arquitecturas industriais que se sitúan no bordo costeiro, como se axeitan ao territorio, onde o mar o condiciona todo, ao tempo que se ofrece unha perspectiva novedosa de difundir o patrimonio neste tipo de proxectos culturais.
300 construcións documentadas
Nos preto de 1.000 quilómetros entre Bares e Rianxo documéntanse 300 construcións clasificadas en 8 tipoloxías: muíños, conserveiras, estaleiros, cetarias, industria acuícola, secadeiros, portos e industria baleeira.
As fotografías seleccionadas dispoñen, ademais, dunha análise acompañada dun pequeno texto. Para desenvolver “Arquitectura ao límite”, proxecto concibido como unha plataforma de revisión e debate, optouse polo emprego e combinación destas tecnoloxías para difundir e contribuír á conservación dos inmobles, algúns dos cales están en perigo de desaparecer. Son arquitecturas adaptadas ao territorio e condicionadas por un mar sempre presente, sen o cal non existirían.
Como parte da reflexión que se pretende abrir arredor deste patrimonio singular, o proxecto conta tamén coa participación de cinco arquitectos da Escola Técnica Superior de Arquitectura da UDC: Carlos Quintáns, que actuou ademais como coordinador científico, David García-Louzao, Elisa Gallego, Óscar Fortes e Juan Creus. As converas poderán verse a través do web da Fundación María José Jove.
Alén disto, o proxecto complétase co deseño de rutas para coñecer as distintas paisaxes industriais; varios recursos didácticos que difunden este tipo de patrimonio entre os máis pequenos e unha selección de recursos bibliográficos.
Arquitectura ao límite enmárcase no programa de proxectos singulares de especial interese cultural que contan co apoio da Deputación da Coruña. Pola súa banda o MUV, plataforma dixital e virtual pioneira para a difusión da arte e a cultura, continúa na súa promoción de novas formas de incidir na investigación e na transferencia de coñecemento, facilitando a conexión entre persoas de diferentes ámbitos e disciplinas que contribúan á produción de ideas e accións críticas en relación co contexto máis próximo: Galicia.
O proxecto “Arquitectura ao límite” pode verse ao completo nesta ligazón.
